Prezident Donald Trampın ABŞ dövlət katibi vəzifəsinə digər potensial namizədi, 65 yaşlı Tennessi senatoru Bill Hagerti Ukraynaya maliyyə dəstəyinin əsas tənqidçilərindən biri kimi tanınır.
Turkustan.az xəbər verir ki, CBS telekanalına müsahibəsində o, hərbçilərə inanmadığını bildirib.
“Amerika xalqı öz vəsaitimizi və resurslarımızı başqa bir ölkənin suverenliyini müdafiə etməyə sərf etməzdən əvvəl Amerikanın suverenliyinin qorunmasını istəyir”, o qeyd edib.
Hagerti 2020-ci ildə Senata seçilməzdən əvvəl Tramp administrasiyasının Yaponiyadakı səfiri vəzifəsində çalışıb.
Həm dövlət katibi postuna ən şanslı namizəd kimi adı çəkilən Marko Rubio, həm də Hagerti Çinə qarşı sərt xətt tərəfdarları hesab olunur. Xüsusilə, Hagerti Çin rabitə və elektronika şirkətlərinə qarşı sanksiyaları dəstəkləyir və Pekini “ABŞ və dünyanın qalan hissəsi üçün təhlükə” adlandırır.
Hagertinin sözlərinə görə, Amerika xalqının 36 ildən sonra ilk dəfə böyük səs çoxluğu ilə prezident seçməsi “ölkəni idarə edən siyasətçilərin öz xalqından uzaqlaşaraq, başqa dövlətlərə pul xərcləməyə üstünlük vermələrinin nəticəsidir”.
“Fikir verin, biz Ukraynaya 175 milyard dollar yardım göndərdik”, - Tennessi senatoru CBS telekanalına müsahibəsində deyib. "Bu, ABŞ Dəniz Piyadaları Korpusunun illik büdcəsindən üç dəfə çoxdur. Mən ABŞ Senatında Ukraynaya bu yardımın hər faizinin əleyhinə səs verən və ona qarşı çıxan azsaylı senatorlardan biri idim. Mən Amerika xalqını dinlədim. Biz ilk növbədə öz problemlərimizə diqqət yetirməliyik. Mən buna görə çox tənqid aldım, amma Amerika xalqı bunu dilə gətirdi və bizim etməmizi istədi. Biz heç vaxt Ukraynada olmamalıydıq”. /AzPolitika.info/
