Rusiya lideri Putin ötən gün Kazanda keçirdiyi BRİKS sammiti ilə Ukrayna böhranı səbəbiylə yaşadığı beynəlxalq təcrid vəziyyətini aradan qaldırmağa çalışarkən, bu il BRİKS-ə yeni üzv qəbul olunmayacağı açıqlanıb.
Turkustan.az xəbər verir ki, Rusiya lideri Vladimir Putinin ev sahibliyi ilə Tatarıstan Respublikasının paytaxtı Kazanda 32 ölkənin iştirakı ilə keçirilən BRİKS sammiti dünən başlayıb. Üç gün davam edəcək 16-cı BRİKS sammitində praktik olaraq çoxqütblü dünyanın qurulması üçün mühüm addımların atılacağını bildirən Putin, BRİKS təşkilatına xidmət edəcək və Qərbin maliyyə maneələrini aşmaq üçün istifadə olunacaq Yeni İnkişaf Bankını da təqdim edəcək.
Dünən liderlər Kazana gəlməyə başlayanda maraqlı hadisələr yaşanıb. Sammitin bir nömrəli qonağı olan Çin lideri Si Cinpinin təyyarəsi Ural dağları üzərindən keçən kimi onun yanında Rusiya Hərbi Hava Qüvvələrinə məxsus SU-35 qırıcısı peyda olub. Rusiya döyüş təyyarəsi Çin liderini daşıyan təyyarəni hava limanına enənə qədər müşayiət edib. Kazan şəhəri Ukrayna cəbhəsindən 1200 kilometr uzaqda olsa da, Ukraynanın kamikadze pilotsuz uçan aparatlarının son vaxtlar uçuş məsafəsini 2 min kilometrə çatdırdığı məlum olduğundan təhlükəsizlik tədbirlərinin artırılması diqqət çəkir.
Sammitin ilk günündə Rusiya, Hindistan və Çin liderlərinin ikitərəfli təmasları olduğu bir vaxtda Kazan şəhəri keçilməz qalaya çevrilmişdi. Dünən səhər saatlarından şəhərin mərkəzində mobil internet bağlantısı kəsilib. Hətta telefon zəngləri etmək də problemlidir. Şəhər mərkəzinə gedən bütün küçə və prospektlər də nəqliyyatın hərəkəti üçün bağlanıb.
Rusiya lideri Putinin BRİKS sammitindən təcriddən çıxmaq üçün alət kimi istifadə etməsi, Çin və Hindistanın isə Qərbi qəzəbləndirməyəcək bəyanatlar verməsi də diqqət çəkib. Çin lideri Xi Jinping sammitin təşkilini yalnız təriflədiyi halda, Hindistanın baş naziri Narendra Modinin ikitərəfli əlaqələrin inkişafını vurğulaması və Qərbi bu işə cəlb etməməsi diqqət çəkir. Zirvəyə gələn liderlərin yeganə ümumi şüarı “İndiki sivil dünyada bir ölkənin digərinə iqtisadi sanksiyalar tətbiq etməsi qəbuledilməzdir və nəticə verməyəcək” olub.
Prezident Rəcəb Tayyib Ərdoğanın bu gün sammitə qonaq qismində qatılacağı və Putinlə ikitərəfli görüş keçirəcəyi gözlənildiyi halda, Rusiya tərəfi Kazan sammitində yeni üzvləri qəbul etməyəcəyini açıqlayıb. Bəzi ölkələrin, eləcə də Türkiyənin BRİKS-ə üzvlük üçün müraciət etdiyi gündəmə gətirilib. Rusiya xarici işlər nazirinin müavini Sergey Ryabkov, “Kazan sammitində yeni üzvlərin qəbulu gözlənilmir. İştirak etmək istəyən ölkələrə böyük hörmətimiz var və onların müraciətlərinə böyük əhəmiyyət veririk. Bununla belə, 2024-cü ilin əvvəlində 5 yeni üzv qəbul edildi. BRİKS bu yeni üzvlərlə dialoq mexanizmlərinin inkişafı üzərində intensiv işləyir. Ona görə də bu il yeni üzv qəbul edilməyəcək”.
Eltac Zülfüqaroğlu/Turkustan.az
