Pakistan hərbi gərginliyin artması fonunda Hindistanla həmsərhəd olan Kəşmirdə Nəzarət Xətti boyunca qoşunlarının döyüş hazırlığını artırıb.
Turkustan.az xəbər verir ki, bu barədə “The Economic Times” məlumat yayıb.
Mənbənin sözlərinə görə, Pakistan Sialkot bölgəsində hava hücumundan müdafiə və elektron döyüş vasitələrini, həmçinin tank və piyada diviziyalarını yerləşdirib. Ordu fəal şəkildə hərbi birləşmə manevrləri həyata keçirir.
Pakistanın baş naziri Şahbaz Şərif BMT-nin baş katibi Antonio Quterreşlə telefon danışığında İslamabadın Kəşmirin Hindistan tərəfindəki Pahalqam rayonunda 26 nəfərin ölümü ilə nəticələnən terror aktında iştirakının olmadığını bildirib.
"Mən Pakistanın terrorizmin bütün təzahürlərini pislədiyini təkrarladım, Hindistanın əsassız iddialarını rədd etdim və şəffaf və qərəzsiz araşdırmaya çağırdım", - Şərif “X” hesabında yazıb.
O, həmçinin BMT-ni Kəşmir probleminin BMT Təhlükəsizlik Şurasının qətnamələrinə uyğun olaraq həllində fəal rol oynamağa çağırıb.
"Pakistan sülhə sadiq qalır, lakin etiraz ediləcəyi təqdirdə öz suverenliyini bütün gücü ilə müdafiə edəcək", - baş nazir əlavə edib.
Aprelin 29-da Pakistanın İnformasiya və Yayım naziri Ataullah Tarar bildirmişdi ki, Hindistan yaxın 24-36 saat ərzində Pakistana hücum planlaşdırır./publika.az
