2025-ci il iyunun 1-dən Özbəkistanda “qızıl viza” – əcnəbi vətəndaşlar və vətəndaşlığı olmayan şəxslər üçün beş illik yaşayış icazəsi almaq üçün sadələşdirilmiş prosedur tətbiq ediləcək.
Turkustan.az xəbər verir, bu müddəa Özbəkistan Respublikası Prezidentinin 18 aprel tarixli fərmanında təsbit edilib.
Sənədi əldə etmək üçün ərizəçi 200 min ABŞ dolları məbləğində töhfə verməlidir. İstər həyat yoldaşı, istər uşaq, istərsə də valideyn kimi hər bir ailə üzvü üçün əlavə 100.000 dollar ödənilir. Bu halda Özbəkistanda daşınmaz əmlak almaq lazım deyil; sadəcə olaraq investisiya ödənişi etmək kifayətdir.
Ölkədə beş illik yaşayış icazəsi əcnəbilərə daimi yaşamaq, bank və digər xidmətlərdən istifadə etmək, sənədləşmə işləri aparmaq, mənzil kirayələmək və ya almaq, bizneslə məşğul olmaq hüququ verir.
Özbəkistan hakimiyyəti ümid edir ki, proqram ölkəyə zəngin investorları cəlb edəcək və iqtisadiyyata kapital və bilik axınını artıracaq.
Oxşar “qızıl vizalar” artıq bir sıra ölkələrdə, məsələn, Portuqaliya, İspaniya, BƏƏ, Kanada, ABŞ və s. tətbiq edilib. Onlar əcnəbilərə iqtisadiyyata, daşınmaz əmlaka və ya milli layihələrə investisiyalar müqabilində yaşayış icazəsi və ya vətəndaşlıq almağa imkan verir. /publika.az/
