2025-ci ilin mart ayında Rusiya işğalçı qüvvələri Ukraynada cəmi 143 kvadrat kilometr irəliləyə bilib ki, bu da son beş ayda ən aşağı göstəricidir.
Turkustan.az xəbər verir ki, ABŞ Müharibə Araşdırmaları İnstitutunun(ISW) hesabatında deyildiyi kimi, Rusiyanın Ukraynadakı hücumunun tempi durmadan azalır.
Hesabatda qeyd olunur ki, Böyük Britaniya Müdafiə Nazirliyinin hesablamalarına görə, Rusiya qoşunlarının irəliləmə sürəti 2024-cü ilin noyabr ayından etibarən hər ay ardıcıl olaraq yavaşlayır. Əgər noyabrda rus qoşunları təxminən 730 km² ərazini ələ keçiriblərsə, dekabrda 393 km², 2025-ci ilin yanvarında 326 km², fevralda 195 km², martda isə 143 kvadrat kilometri işğal edə biliblər.
ISW eyni zamanda geolokasiya videosu və peyk məlumatlarının təhlili əsasında oxşar tendensiyaları qeyd edir. Onun hesablamalarına görə, 2024-cü ilin noyabrında Rusiyanın irəliləməsi 627 km², dekabrda 569 km², yanvarda 427 km², fevralda 354 km², martda isə 203 km² olub.
Hesabatda qeyd edilir ki, Böyük Britaniya Müdafiə Nazirliyi Rusiyanın Ukraynadakı irəliləyişlərini qiymətləndirmək üçün çox güman ki, fərqli metodologiya və ya mənbələrdən istifadə edir. Lakin MN hesabatı 2024-cü ilin noyabrından 2025-ci ilin martına qədər Rusiyanın aylıq irəliləyişinin azaldığını göstərən ISW məlumatlarına uyğundur.
Rusiyanın irəliləməsinin ləngiməsi qismən Ukrayna qüvvələrinin uğurlu hərəkətləri, o cümlədən Pokrovsk və Toretsk istiqamətlərində uğurlu əks-hücumları nəticəsində itirilmiş mövqelərin bərpası ilə bağlıdır. ISW-nin fikrincə, bu əməliyyatlar Rusiyanın irəliləyiş sürətini yavaşlatmaqda əsas rol oynayıb. Bundan əlavə, Ukrayna qüvvələrinin Borovaya bölgəsində aktivlik nümayiş etdirməsi düşməni cilovlamaq üçün davam edən səylərdən xəbər verir.
Digər tərəfdən, Rusiya əhəmiyyətli zərbələr endirmək qabiliyyətini özündə saxlayır. Bunu 2025-ci il aprelin 5-6-da Qara dənizdəki gəmilərdən atışlar da daxil olmaqla, raket və pilotsuz təyyarələrdən istifadə etməklə son bir ayda həyata keçirilən ən böyük hücum sübut edir. Bu, onu deməyə əsas verir ki, quruda sürətin ləngiməsinə baxmayaraq, Kreml hava hücumlarını gücləndirməklə zəifliyini kompensasiya etməyə çalışır. /AzPolitika.info/
