İran xalqının iqtisadi problemlərlə üzləşdiyi bir vaxtda şəxsi imkanları ilə Cənub qütbünə dəbdəbəli səfərə getdiyi üçün tənqid hədəfinə çevrilən parlament işlərindən məsul vitse-prezident Şəhram Debiri tutduğu vəzifədən uzaqlaşdırılıb.
Turkustan.az xəbər verir ki, Rəyasət Heyətinin yazılı açıqlamasına görə, prezident Məsud Pezeşkian verdiyi fərmanla Debiri vəzifəsindən azad edib.
Bəyanatda Pezeşkiyanın aşağıdakı ifadələri yer alıb:
"Novruz günlərində Cənub qütbünə istirahət səfərində olduğunuz aşkarlandı. Dindarlardan nümunə götürməklə fəxr edən hökumətdə, xalqa qarşı iqtisadi təzyiqlərin hələ də yüksək olduğu və yoxsulların çox olduğu bir ölkədə məmurların, hətta şəxsi xərcləri də olsa, bahalı istirahətə getməsi nə müdafiə olunar, nə də əsaslandırılır və məmurların yaşayış səviyyəsinə uyğun gəlmir".
Vitse-prezident Debiri Novruz bayramında Cənub qütbünə getdiyi üzə çıxanda xüsusilə mühafizəkar medianın tənqid hədəfinə çevrilib.
Varlı bir həkim olan Debiri səfərə dövlət vəsaiti ilə deyil, öz pulu ilə getdiyini açıqlasa da, bu, insanların iqtisadi problemlərlə mübarizə apardığı ölkədə əks-səda doğurub.
Aytən Yaşar/ Turkustan.az
