Yaxın həftələr və ya aylar ərzində tam atəşkəslə bağlı razılığın əldə olunması mümkün olaraq qalır.
Turkustan.az xəbər verir ki, bu fikri Vladimir Zelenski Çerniqov vilayətinin ərazi icmalarının nümayəndələri ilə görüşündə deyib.
"Düşünürəm ki, bunu mümkün qədər tez, yaxın həftələr, bəlkə də aylar ərzində etmək mümkündür. Bəzən hər şey bir anda baş verir. Xüsusilə də müharibənin bitməsinin bu hissəsi - qaynar faza, tam atəşkəs fərqli ola bilər"-deyə, o bildirib.
Bildirək ki, martın 18-də Rusiya və ABŞ prezidentləri Vladimir Putin və Donald Tramp telefonla Ukraynadakı vəziyyəti, gərginliyin qarşısının alınması şərtlərini və bir sıra beynəlxalq məsələləri müzakirə ediblər. Kremlin mətbuat xidmətinin məlumatına görə, Putin Amerika liderinin Ukraynadakı münaqişə tərəflərinin 30 gün ərzində enerji infrastrukturu obyektlərinə zərbələrdən qarşılıqlı imtina etməsi təklifi ilə razılaşıb. Ağ Evin məlumatına görə, tərəflər həmçinin “Qara dənizdə atəşkəs, tam atəşkəs və daimi sülh”ün tətbiqi ilə bağlı texniki danışıqlara başlamaq barədə razılığa gəliblər.
Aytən Yaşar/ Turkustan.az
