Çin tezliklə Ermənistana yeni səfir təyin edəcək.
Turkustan.az xəbər verir ki, bu barədə Çinin İrəvandakı müvəqqəti işlər vəkili Çen Min bildirib.
Təyinatın 2025-ci ilin sonuna qədər olub-olmayacağı ilə bağlı suala diplomat belə cavab verib: “Tezliklə”.
Çen Min fevralın 1-də də Pekinin tezliklə Ermənistana yeni səfir təyin edəcəyini söyləmişdi.
Xatırladaq ki, 10 aya yaxındır Çinin Ermənistanda səfiri yoxdur. Çin diplomatik missiyasının əvvəlki rəhbəri Fan Yonq missiyasını 2024-cü il iyulun 11-də başa vurub.
Erməni ekspert Suren Sərkisyan bundan əvvəl məsələ ilə bağlı bildirmişdi ki, bu, Ermənistan-Çin münasibətləri tarixində görünməmiş və müstəsna hadisədir: “Bu, aydın bir mesajdır, belə hallarda heç bir təsadüf olmur. Əmin olun ki, Pekinin diplomatik arsenalında bu gün İrəvana göndərilə bilən yüzlərlə peşəkar var, amma hansısa səbəbdən bunu etmir”.
Sərkisyan bunu Ermənistan rəhbərliyinin Çinin nəqliyyat dəhlizləri ilə bağlı “Bir Kəmər, Bir Yol” layihəsinə müsbət yanaşmaması və Pekinin separatçı kimi qəbul etdiyi Tayvan nümayəndə heyətini İrəvanda yüksək səviyyədə qəbul etməsi ilə əlaqələndirmişdi./teleqraf
