Amerikanın “Axios” xəbər portalının iki ABŞ rəsmisinə istinadən verdiyi xəbərə görə, Ağ Ev İranla nüvə müzakirələri variantlarını dəyərləndirir.
Turkustan.az xəbər verir ki, xəbərə görə, ABŞ prezidenti Tramp Yaxın Şərqdə Amerika hərbi varlığını artırarkən Tehranla dolayı nüvə danışıqlarını ciddi şəkildə nəzərdən keçirir.
Daha əvvəl İranla birbaşa nüvə danışıqlarına üstünlük verəcəyini bildirən Tramp, İranın yalnız “Omanın vasitəçiliyi ilə aparılan dolayı danışıqları” qəbul edəcəyi xəbərindən sonra dolayı danışıqlara müsbət baxmağa başlayıb.
Hələlik məsələ ilə bağlı heç bir qərar verməyən Tramp milli təhlükəsizlik komandası ilə İranla nüvə danışıqlarının yol xəritəsini müəyyən etməyə çalışır.
ABŞ rəsmilərindən biri Tramp administrasiyasının birbaşa danışıqların uğur şansının daha yüksək olacağını düşündüyünü, lakin iranlıların təklif etdiyi formatın diqqətdən kənarda qalmadığını və Omanın keçmişdə vasitəçi kimi fəaliyyət göstərməsinə etiraz etmədiyini bildirib.
Hər iki ABŞ rəsmisi hələ heç bir qərarın verilmədiyini və daxili müzakirələrin davam etdiyini qeyd edərək, rəsmilərdən biri: “Məktub mübadiləsindən sonra biz indi iranlılarla danışıqlara başlamaq və etimadın yaradılması üçün növbəti addımları müzakirə edirik” -deyib.
Aytən Yaşar/ Turkustan.az
