Rusiya Müdafiə Nazirliyi Ukraynanın Rusiyanın enerji infrastruktur obyektlərinə hücumlarını davam etdirdiyini bildirib.
Turkustan.az xəbər verir ki, nazirlikdən verilən yazılı açıqlamada, Ukrayna ordusunun gecə saatlarında Kursk bölgəsindəki elektrik infrastrukturu obyektinə artilleriya və pilotsuz uçuş aparatları (PUA) ilə hücumlar təşkil etdiyi bildirilib.
Hücumlar nəticəsində elektrik enerjisində fasilələr yarandığına diqqət çəkən bəyanatda deyilir: “Ukrayna prezidenti Vladimir Zelenski də daxil olmaqla Kiyev administrasiyasının nümayəndələrinin öhdəliklərinə baxmayaraq, Ukrayna Silahlı Qüvvələri PUA və artilleriya ilə Rusiyanın enerji infrastrukturuna hücumları davam etdirir”.
ABŞ prezidenti Donald Tramp və Rusiya prezidenti Vladimir Putin arasında martın 18-də keçirilən görüşdən sonra Rusiya və Ukraynanın enerji infrastrukturu obyektlərinə hücumları 30 gün müddətinə dayandırmaq barədə razılığa gəldiyi açıqlanıb.
Kreml ABŞ-la əldə olunan razılaşmaya əsasən, Rusiya və Ukraynada neft emalı zavodları və enerji boru kəmərləri kimi obyektlərə hücumların dayandırılacağını açıqlamışdı.
Aytən Yaşar/ Turkustan.az
