Trampın təhdidi dünyanı TƏŞVİŞƏ SALDI – Böyük savaş BAŞLAYIR...

İran ətrafında gərginlik artmaqda davam edir. Artıq bir müddətdir Tehranla Vaşinqton hələlik bir-birini sözdə təhdid etməklə məşğuldurlar.

Qarşılıqlı xəbərdarlıqlar

ABŞ prezidenti Donald Tramp sosial media hesabında etdiyi açıqlamasında bildirib ki, nə husilər, nə də İrandakı sponsorları əsl ağrını hələ görməyiblər:

"Hücumların son iki həftəsi ərzində husilər məhv edilib. Onların döyüşçülərinin və liderlərinin əksəriyyəti artıq aramızda deyil. Biz onları hər gün və hər gecə daha sərt şəkildə vururuq.

Seçim Husilər üçün aydındır: ABŞ gəmilərinə atəş açmağı dayandırsınlar, biz də onlara atəş açmağı dayandıraq. Əks halda, biz yenicə başlamışıq. Əsl ağrı həm Husilər, həm də İrandakı sponsorları üçün hələ gəlməyib".

Buna cavab olaraq İranın dini lideri Xamenei isə bəyan edib ki, amerikalılar və sionist rejimi tərəfindən hər hansı bir düşmənçilik hərəkətinə yol verilsə, güclü cavab zərbəsi alacaqlar.

Qeyd edək ki, martın əvvəlində ABŞ Prezidenti İranın dini liderinə məktub ünvanlayaraq onu nüvə məsələsi ətrafında danışıqlara dəvət etdi. Əks təqdirdə, Tramp bunun İran üçün ağır nəticələrə səbəb olacağını bildirib. Lakin rəsmi Tehran birbaşa danışıqlardan imtina edərək, yalnız vasitəçilərin iştirakı ilə təmaslara hazır olduğunu bəyan edib.

Böyük savaş alovlanır

Mövzu ilə bağlı Bizim.Media-ya açıqlama verən politoloq Tofiq Abbasovun fikrincə, ABŞ-ın İranla müharibəyə başlaması ehtimalı olduqca minimaldır:

“Düzdür, ritorika həddən artıq aqressiv və hücum ritorikasıdır. Tramp ultimatumla danışır. Amma ona verilən cavab da özünəməxsusluğu ilə diqqət çəkir. Xameneyi, Pezeşkian İranla təhdid dililə danışmağa heç kimin ixtiyarının olmadığını bildiriblər. Ardınca qeyd ediblər ki, ABŞ müharibəyə başlasa, öz başı ağrıyacaq. Üçüncü analitik beyin mərkəzləri də göstərir ki, Amerikanın belə planı olsa da, onun arxasında durmaq çətin olacaq. Çünki İranla müharibə böyük bir regionu ayaq üstə qaldıra və İsrailin müqəddəratı gündəmə gələ bilər”.

Politoloqun fikrincə, məsələnin görünməyən tərəfi odur ki, ABŞ-ın regionda hərbi bazaları mövcuddur və onlar çoxdan İranın paket potensialının hədəfindədir:

“Digər tərəfdən, husilər, İraqdakı qruplaşmalar müharibə başlasa, İranın tərəfində prosesə qatılacaq”.

T.Abbasov düşünür ki, mövcud durumda diplomatik danışıqlar ən münasib variant kimi daha realdır:

“İndiki halda ABŞ-ın risk edib İrana hücum etməsi açıq-aşkar avantürizmdir. ABŞ-ın hərbi birləşmələri döyüşmək məsələsində çox zəifdir. Bir o qədər də səriştələri yoxdur. Texnikaları mütərəqqi olsa belə, döyüşdə hər şeyi həll edən insan faktorudur. Bu baxımdan Amerikanın Vyetnam, Koreya, Əfqanıstan kampaniyalarını misal göstərə bilərik.

Məsələnin daha çox alovlanmaması üçün prosesdə habelə Çin və Rusiyanın iştirakı da mümkündür. Nəticədə tərəflər dialoqa başlaya bilərlər. Lakin Tehran birbaşa dialoqa getməyəcəyini deyir. Amma vasitəçilərlə dialoqu mümkün sayır. Deməli, diskussiya potensialı tükənməyib və kompromis axtarışına da yer ayrılmalıdır”.