Türkiyənin ana müxalifət partiyası Cümhuriyyət Xalq Partiyası (CHP) 6 aprel tarixində növbədənkənar qurultay keçirməyə hazırlaşır. Partiya sədri Özgür Özəl sonuncu qurultayda saxtakarlıq iddiaları fonunda partiyaya xüsusi nümayəndə təyin edilməsinin qarşısını almaq məqsədilə qurultay qərarı verib.
Qurultay öncəsi CHP daxilində mühüm proseslər gedir. Xüsusilə partiyanın keçmiş sədri Kemal Kılıçdaroğlunun yenidən namizəd olub-olmayacağı böyük maraq doğurur.
Turkustan.az xəbər verir ki, Türkiyə mediasında yayılan məlumatlara görə, Kılıçdaroğlunun namizədliyini irəli sürməsi üçün partiya daxilində bəzi nümayəndələr tərəfindən imza toplanmağa başlanılıb.
Bununla bağlı rəsmi açıqlama verilməsə də, bu addım Kılıçdaroğlunun yenidən CHP sədrliyinə namizəd olacağı ehtimallarını gücləndirib.
CHP sədrinin müavini İlhan Üzgel məsələ ilə bağlı saytımıza ötən gün verdiyi açıqlamada bildirib ki, hər kəsin namizəd olmaq hüququ var və proses demokratik şəkildə həyata keçiriləcək. O, hazırkı sədr Özgür Özəlin asanlıqla yenidən seçilməsini gözlədiklərini vurğulayıb.
Kılıçdaroğlu isə "Sözcü" qəzetinə verdiyi açıqlamada birbaşa namizədliyini elan etməyib, “qurultayda kimi seçərlərsə, doğrusu o olacaq”, - deyə o bildirib. Sabiq partiya sədri indiyə qədər heç vaxt "mən namizədəm" demədiyini xatırladıb, prosesin demokratik keçməsinin vacibliyini vurğulayıb.
Qeyd edək ki, 2023-cü ildə keçirilən prezident seçkilərində məğlubiyyətə uğrayan Kemal Kılıçdaroğlu bundan sonra partiya rəhbərliyindən ayrılmışdı. Lakin son dövrlərdə partiya daxilində yaşanan proseslər onun yenidən siyasət səhnəsinə qayıdacağı ehtimallarını artırır./modern.az
