Tərəflər üçün məqbul olan razılaşmalar əldə edildikdə, Rusiya hərbi əməliyyatları dayandıracaq.
APA-nın Moskva müxbiri xəbər verir ki, bunu Rusiya xarici işlər naziri Sergey Lavrov Türkiyə XİN başçısı Hakan Fidanla danışıqlarının yekunlarına dair birgə mətbuat konfransında bildirib.
Onun sözlərinə görə, təmas xətti boyunca hərbi əməliyyatların dayandırılması ilə dərhal atəşkəs və gələcək addımlar barədə düşünmə variantı Rusiyanı qane etmir.
“Prezident açıq şəkildə bildirdi ki, biz həm Ukrayna, həm də Avropa ilə, xoşməramlı ruhda sülhün əldə olunmasına kömək etmək istəyən istənilən nümayəndə ilə danışıqlara hazırıq, lakin biz hərbi əməliyyatları yalnız o zaman dayandıracağıq ki, bu danışıqlar Rusiya Federasiyasını qane edən möhkəm, dayanıqlı nəticə versin və əlbəttə ki, yerdəki reallıqlar nəzərə alınmalıdır”, - Rusiya XİN başçısı vurğulayıb.
