Rusiyanın xarici işlər naziri Sergey Lavrov ABŞ nümayəndə heyəti ilə görüşdə Ukrayna probleminin həlli üçün yaxın vaxtlarda prosesin qurulması barədə razılığa gəldiklərini bildirib.
Turkustan.az xəbər verir ki, Lavrov ABŞ və Rusiya nümayəndə heyətləri arasında Səudiyyə Ərəbistanının paytaxtı Ər-Riyadda keçirilən görüşdən sonra ikitərəfli əlaqələr və Ukraynada müharibəyə son qoyulmasını müzakirə etmək üçün mətbuat konfransı keçirib.
Hər bir ölkənin öz milli maraqlarına uyğun hərəkət etməli olduğunu deyən Lavrov, "ABŞ-la milli maraqlarımız hər zaman üst-üstə düşməyə bilər. Bununla belə, yarana biləcək fikir ayrılıqlarını həll etmək və xüsusilə də hərbi qarşıdurmalara səbəb olmamaq vacibdir. Yanaşmalar üst-üstə düşəndə təşəbbüsləri birləşdirmək, geopolitik və iqtisadi sahədə ortaq maraqları təmin edən layihələri həyata keçirmək lazımdır"-deyə, o bildirib.
ABŞ tərəfi ilə aparılan danışıqların faydalı olduğunu deyən Lavrov, "Bir-birimizi dinləməkdən əlavə, bir-birimizi eşitdik. Deyə bilərəm ki, Amerika tərəfi bizim mövqeyimizi daha yaxşı anlamağa başladı"-deyə, qeyd edib.
Aytən Yaşar/ Turkustan.az
