Böyük Britaniyanın baş naziri Keyr Starmer ölkəsinin milli təhlükəsizliyinin nəsillər boyu davam edəcək problemlə üzləşdiyini və bütün Avropanın müdafiəyə daha çox pul xərcləməli olduğunu deyib.
Turkustan.az xəbər verir ki, İngiltərənin baş naziri Keyr Starmer Ukrayna ilə bağlı Fransada keçiriləcək fövqəladə toplantıdan əvvəl İngiltərənin Bristol şəhərində mətbuata açıqlama verib.
Böyük Britaniyanın “milli təhlükəsizliyə gəldikdə, nəsillər boyu bir problemlə üzləşdiyini” xəbərdar edən Starmer deyib: “Aydındır ki, aktual sual Ukraynanın gələcəyidir və bundan sonra nə olursa olsun, biz Ukraynanı mümkün olan ən güclü mövqeyə qoymağa davam etməliyik və əgər sülh varsa, hamımız sülh istəyiriksə, bunun davamlı olduğuna əmin olmalıyıq".
O, İngiltərə hökumətinin strateji müdafiə araşdırması apardıqdan sonra müdafiə xərclərini 2,5%-ə çatdırmaq öhdəliyini yerinə yetirmək üçün bir yol müəyyən edəcəyini vurğulayıb.
Baş nazir, "Avropalı müttəfiqlərimizə mesajımın bir hissəsi ondan ibarətdir ki, biz hamımız həm qabiliyyət, həm xərcləmə və maliyyələşməni gücləndirməliyik. Buraya Böyük Britaniya da daxildir və buna görə də mən daha çox xərcləmə öhdəliyi götürmüşəm"-deyə, əlavə edib.
Aytən Yaşar/ Turkustan.az
