Martın 1-nə planlaşdırılan aksiya ilə bağlı bildiriş artıq Berlin hakimiyyətinə təqdim edilib
Rusiya müxalifəti Berlində “Rusiya Putinə qarşı” şüarı altında yeni etiraz yürüşü keçirəcək. Turkustan.az xəbər verir ki, bu barədə müxalifətçi İlya Yaşin öz “Telegram” kanalında yazıb. Bildirib ki, martın 1-nə planlaşdırılan aksiya ilə bağlı bildiriş artıq Berlin hakimiyyətinə təqdim edilib.
Yaşinin sözlərinə görə, yürüş Potsdamer Platzdan başlayacaq, Rusiya səfirliyinin yanından keçərək Brandenburq darvazasında başa çatacaq.
Yürüşün təşkilatçıları rusiyalı müxalifətçilər İlya Yaşin, Yuliya Navalnaya və Vladimir Kara-Murzadır.
Ötən il noyabrın 17-də onlar artıq Berlində müharibə əleyhinə yürüş keçirdilər. Yürüşdə minlərlə insan iştirak edib. İştirakçılar “Putinsiz Rusiya” və “Müharibəyə yox” şüarları səsləndiriblər.
Dekabrda Yaşin, Navalnaya və Kara-Murza rusların demokratik və anti-müharibə birliklərinə müraciət edərək, martın 1-də Berlində “Putin, öldürməyi dayandır” əsas şüarı ilə yeni aksiyanın hazırlanmasına çağırış ediblər.
İlk yürüşdə olduğu kimi, yeni aksiyanın təşkilatçıları Ukraynadakı müharibə və Ukrayna xalqı ilə həmrəylik zərurətinə deyil, bir şəxs kimi yalnız Putinə diqqət yetirdiklərini iddia edərək tənqid olunublar.
Yaşin, Kara-Murza və Navalnaya Rusiyanın ən məşhur müxalifətçilərindəndir. İlk ikisi Rusiyada müxalifətə və müharibə əleyhinə fəaliyyətlərinə görə uzun müddətə azadlıqdan məhrum ediliblər və əsir mübadiləsi nəticəsində dəyişdiriliblər. Həbsxanada dünyasını dəyişən müxalifət lideri Aleksey Navalnının arvadı Yuliya Navalnaya işini davam etdirəcəyini bəyan edib. Mühacirətdəki rus müxalifətinin vahid rəhbər strukturu yoxdur. Yaşin, Navalnaya və Kara-Murza ayrı-ayrılıqda fəaliyyət göstərirlər. /AYNA/
