Azərbaycan ilə Türkiyə arasında diplomatik əlaqələrin qurulmasından 33 il ötür.
Turkustan.az xəbər verir ki, Azərbaycan Sovet İttifaqından müstəqilliyini elan etdikdən sonra 1992-ci il yanvarın 14-də Türkiyə Respublikasının Bakıdakı Baş Konsulluğunun səfirliyə çevrilməsi ilə başlayan diplomatik əlaqələr “bir millət, iki dövlət" prinsipi ilə gündən-günə inkişaf etdirildi və son 33 ildə müttəfiqlik səviyyəsinə qaldırıldı.
Türkiyə-Azərbaycan münasibətlərinin tarixi əslində 33 il əvvələ deyil, Azərbaycanın müstəqilliyini elan etdiyi 1918-ci ildən başlayır.
Daha sonra Sovetlərin dağılması və Azərbaycanın ikinci dəfə müstəqilliyini elan etməsi ilə iki qardaş ölkə 70 ildən sonra yenidən bir araya gəldi. Türkiyə Cümhuriyyəti Nazirlər Şurası 1991-ci il noyabrın 9-da Azərbaycanın müstəqilliyinin tanınması haqqında qərar qəbul etdi. Beləliklə, Türkiyə Azərbaycanın müstəqilliyini tanıyan ilk ölkə oldu.
Prezidentlər Ayaz Mütəllibov və Əbülfəz Elçibəyin dövründə Türkiyə ilə Azərbaycan arasında münasibətlərin yaxşılaşdırılması istiqamətində müəyyən addımlar atıldı, müqavilələr imzalandı, lakin Heydər Əliyevin hakimiyyətə gəlməsi ilə münasibətlər yeni inkişaf mərhələsinə qədəm qoydu. Prezident Heydər Əliyevin Türkiyə və Azərbaycan üçün işlətdiyi “bir millət, iki dövlət” sözləri münasibətlərdə təməl prinsip oldu. Heydər Əliyevlə Süleyman Dəmirəl dostluğu da münasibətlərdə fəal rol oynayıb.
Prezident İlham Əliyev də Heydər Əliyevin siyasi xəttini davam etdirərək Türkiyə ilə bütün sahələrdə əlaqələrin inkişaf etdirilməsi siyasətinin prioritetini qoruyub saxladı.
İkitərəfli münasibətlərin daha da möhkəmləndirilməsi məqsədilə 2010-cu il sentyabrın 16-da Prezidentlər səviyyəsində Yüksək Səviyyəli Strateji Əməkdaşlıq Şurası mexanizmi yaradılmışdır. Hər il toplanan şurada əlaqələrin gələcəyi ilə bağlı mühüm qərarlar qəbul edilib, müqavilələr imzalanıb.
1992-ci ildən bu yana iki ölkə arasında hərbi məsələləri əhatə edən 100-ə yaxın saziş və protokol imzalanıb.
Aytən Yaşar/ Turkustan.az
