Bayden miqrantlarla bağlı qərar qəbul edib.
Turkustan.az xəbər verir ki, ABŞ prezidenti Co Bayden Venesuela, Salvador, Ukrayna və Sudandan olan 900 min immiqrant üçün deportasiya müddətini uzadıb. Bu barədə yanvarın 10-da "Reuters" agentliyi məlumat yayıb.
ABŞ Daxili Təhlükəsizlik Departamenti bu ölkələr üçün Müvəqqəti Qorunan Vəziyyət proqramına qeydiyyatı uzadıb, bu immiqrantlara deportasiyadan möhlət və əlavə 18 ay iş icazəsi əldə etmək imkanı verib.
"FWD.us" vəkillik qrupunun prezidenti Todd Schulte bildirib ki, uzadılma yüz minlərlə insana “icmalarına töhfə verməyə, ailələrini dəstəkləməyə və iqtisadiyyatı gücləndirməyə” imkan verəcək. Agentlik vurğulayıb ki, bu addım yeni seçilmiş prezident Donald Trampın bu qorumaları geri götürmək cəhdini gecikdirəcək.
Bildirək ki, dekabrın 22-də ABŞ-ın yeni seçilmiş prezidenti Donald Tramp Arizonada ABŞ-ın “Turning Point USA” konfransında çıxışı zamanı vəzifəyə başladığı ilk gündə ölkə sərhədini qeyri-qanuni miqrantlar üçün bağlayacağını vəd etmiş və ABŞ tarixində ən böyük miqrant deportasiyasını elan etmişdi.
Aytən Yaşar/ Turkustan.az
