ABŞ-nin yeni seçilmiş Prezidenti Donald Trampın andiçmə mərasiminə cəmi bir neçə gün qalmış Ukrayna Silahlı Qüvvələri Rusiyanın Kursk vilayətində həyata keçirdiyi əməliyyatlarda uğur qazanır. Ukrayna ordusu bununla Putini onun ən çətin anında aşağılayır. 2025-ci ildə Kursk əməliyyatı Kreml rəhbəri üçün sonun başlanğıcı ola bilər.
Turkustan.az xəbər verir ki, Britaniya ordusunun ehtiyatda olan polkovniki Hamiş de Bretton-Qordonun “The Telegraph”da dərc olunan məqaləsində belə deyilir.
Onun sözlərinə görə, Putin bərbad hərbi liderə çevrilir: “O, müharibənin əsasları, xüsusən də uğursuzluğu deyil, uğuru təmin etmək prinsipi haqqında heç nə bilmir. Onun üç həftəlik "xüsusi əməliyyatı" dördüncü ilinə yaxınlaşdıqca, çox güman ki, Zelenski gələn il də hakimiyyətdə qalacaq. Putinin ən yaxşı mükafatı isə Şimali Koreyadakı villası və ya Uraldakı dağ mədənlərinə sürgün ola bilər. Rusiya tarixi uğursuz diktatorlar üçün heç də xoş mənzərə vəd etmir”.
Hamiş de Bretton-Qordon xatırladıb ki, Putin Milad bayramına qədər Kursk bölgəsini geri alacağını deyib. Lakin bunun baş tutmaması “onun diktaturasına növbəti psixoloji zərbə kimi görünür”: “Kursk 1943-cü ildə Hitler üçün olduğu kimi, 2025-ci ildə də Putin üçün sonun başlanğıcı ola bilər. Görünür, Ukrayna qüvvələri son bir neçə gündə Kurskda rus qoşunlarına real zərbə vurublar və Rusiyanın 801-ci dəniz piyada briqadası elə bir zərbə alıb ki, Kurskdakı mövqeyindən geri çəkilib. Briqadaya dəstək üçün göndərilən yüzlərlə Şimali Koreyalı isə “itirilib”.
Müəllifin fikrincə, Rusiyanın çoxlu “xərclik generalları” var, lakin Ukrayna Silahlı Qüvvələrinin Kursk bölgəsində irəliləməsinin qarşısını almaq üçün hərbi texnikası yoxdur: "Bu, Kiyevə böyük ümid verir. Suriyada baş verən hadisələrdən, general Kirillovun məhv edilməsindən və Ukraynanın Rusiyaya öz ərazisi ilə Avropaya qaz satmasına imkan verən sonuncu marşrutu bağlamaq qərarından sonra Putin “həyəcan” rejiminə düşüb. Bundan əlavə, Putin bilir ki, Tramp 20 yanvardan sonra çətin ki, ona hər hansı bir xidmət göstərsin”. /azpolitika.info/
