Millət vəkili Fazil Mustafa Milli Məclisin İctimai birliklər və dini qurumlar komitəsinin sədri olaraq Məclisdə ilk vətəndaş qəbulunu keçirib.
II Qarabağ müharibəsinin şəhidi Emin Abbaszadənin valideynləri Faiq Abbasov və Nərminə Abbasova, II Qarabağ müharibəsinin qazisi İlham Xubyarov, tanınmış QHT sədrləri Vüqar Qədirov, Mətanət Cəfərova, ilahiyyatçı Anar Əliyev və başqaları (toplam 15 nəfər) ilə görüşən Fazil Mustafa, onları ətraflı dinlədikdən sonra, toxunulan mövzularla (ictimai birliklərin, dini qurumların fəaliyyəti, eləcə də, hərbi xidmət zamanı həlak olan övladlarına şəhidlik statusu verilməsi məsələsini qaldıran valideynlərin qayğıları və s. ilə) bağlı fikirlərini bölüşüb.
Komitə sədri qaldırılan vacib məsələlər üzrə müvafiq dövlət orqanları ilə müzakirə aparacağını, müraciət məktubları göndərəcəyini bildirib.
İctimai birliklər və dini qurumlar komitəsinin fəaliyyəti, planları barədə danışan Fazil Mustafa, Milli Məclisdə vətəndaş cəmiyyəti institutları ilə bağlı aparılmış müzakirələr, qəbul edilmiş qanunlar, qanunlara əlavə və dəyişiklər barədə məlumat verib.
