Günlərdir hamı bir insandan danışır: Bir çobandan!
Hər halda o, özü-özünü belə adlandırır…
Bizim bu çobanın bir sıra spesifik cəhəti var. Məsələn, qoyun güdmür, əvəzində 10, 15, 20 min dollar maaş verib, alimləri işlədir.
Bəlkə də güdür!
Bizim bu çoban güddüyü alimlərə 10-20 min dollar verə bilir. Deməli, “milyonçu” çobandır!
Bura qədəri belə, söhbətin rahatlıqla “Şərur” MTK-nın sədri, “Şərurlu İsfəndiyar” kimi tanınan İsfəndiyar Axundovdan getdiyini bilmək üçün kifayətdir. “Otaq 9” layihəsində dediyi sözlər ilə gündəmə gələn “Şərurlu İsfəndiyar” ağzının tüpürcəyi qurumadan yeni sensasion açıqlama ilə gündəmi bir-birinə qatıb.
Görünür, “çobanımız” məşhur olmaq qərarına gəlib!
Alimlərdən sonra onun budəfəki hədəfi din, dindarlar, məscidlər olub.
Sitat: “Allaha inanıram, lakin qorxmuram. Qorxum vicdanımdandır. Dindən qorxuram. Mənim əlimdə imkanım olsa, bütün məscidləri söküb yerində məktəb tikdirərəm. Dindarlara inanmıram. Mənə ən böyük zərbələri onlar vurub. İş verirəm, məni aldadırlar. Bütün müqavilələri Allahın adı ilə başlayırlar, sonra da aldadırlar. Dindarların sayının artması ən böyük təhlükədir. Ondan dövlətə qarşı istifadə edirlər”.
Necə də “müdrik” sözlərdir!
“Çoban” məscidləri söküb, yerində məktəb tikdirəcəkmiş!
İmkanı olsa…
Yazının əvvəlindən çoban-çoban deyirəm. Bir çoxları bu peşəni dırnaqarası görsə də, əslində çox uca peşədir. Çoban demək, Vətən demək, onun sərhədi demək, həm də onun müdafiəsi deməkdir. “Kitabi-Dədə Qorqud” dastanındakı “Qaraca çoban” obrazı məhz bu mənaları özündə cəmləyirdi.
Çobanlıq həm də müqəddəs peşədir. Bu peşəyə həm də “peyğəmbər peşəsi” deyilir. Hz. Musa, Hz. Davud, Hz. İsa, hətta İslam peyğəmbəri Məhəmməd Mustafa belə çobanlıq edib.
Göründüyü kimi, çoban var, “çoban” var. Çoban var Allahın elçisi olur, çoban da var…
Qayıdaq bizim “çobana”.
Nə demişdi?
Hə, əlində imkanı olsa, bütün məscidləri söküb yerində məktəb tikdirərmiş. Hamının verdiyi o sualı mən də verim: Görəsən, İsfəndiyar bəy bu günə qədər neçə məktəb tikdirib?
Görəsən, ölkədə məktəb tikmək üçün yermi yoxdur ki, o, bu “saleh əməlini” məscid sökməklə icra etmək istəyir?
Ola bilər, İsfəndiyar Axundov tarix oxumayıb, dünya görüşü azdır. Nəzərinə çatdırım ki, bu ölkənin tarixində məktəb tikən kişilər olub. Məsələn, elə biri məşhur milyonçu Hacı Zeynalabdin Tağıyevdir. Söhbət onun 1898-1901-ci illərdə min bir əziyyət ilə tikdirdiyi müsəlman qızlar məktəbindən gedir. Həmin illərdə deyil qızlar məktəbi tikmək, qızları oxutmurdular belə. Yəni hacının bu niyyəti öz dövrü üçün çox cəsarətli addım idi. Yeri gəlmişkən, qeyd etmək lazımdır ki, 1918-1920-ci illərdə bu binada Azərbaycan Demokratik Cümhuriyyətinin Parlamenti yerləşib.
Görəsən, İsfəndiyar bəy düşünürmü ki, vaxt-vədə yetişib bu dünyadan köçəndə onun nəşini də bir məscidə aparıb, yuyub, kəfənləyəcəklər?
Görəsən, o, fərqindədirmi ki, qəbrində hansısa molla “Yasin”, “Fatihə” oxuyacaq?
Pafos xətrinə çox şey danışmaq olar. Reallıq isə gec-tez dönür yaş əski kimi insanın üzünə dəyir!
Turan Rzayev
Globalinfo.az
