Azərbaycanda daha bir ana üç övladından imtina edib. Böyüyünün 12, digərlərinin 11 və 3 yaşı olan uşaqlar “Təmiz Dünya” Qadınlara Yardım İctimai Birliyinin sığınacağına yerləşdirilib.
“3 övladını sığınacağa yerləşdirən qadın getdikdən sonra uşaqların ən kiçiyi saatlarla anasını görmədiyi üçün ağlayıb. Böyük bacısı onu sakitləşdirmək üçün çox çalışdı. Məlum olub ki, ana TikTok-da tanış olduğu kişi üçün uşaqlarından imtina edib”,- deyə sığınacağın rəhbəri Mehriban Zeynalova belə deyir.
Azərbaycan Uşaqlar Birliyinin sığınacağına isə iki həftə ərzində 13 uşaq qəbul edilib.
Əslində isə bir uşağın ən etibarlı sığınacağı, valideynlərinin qolları arasında olmalıdır, amma təssüf ki, bəzi uşaqlar bu güvəni duya bilmirlər. Sevgiyə, diqqətə, etibara ən çox ehtiyac duyduqları bir vaxtda ən təbii hüququ olan ailə nəvazişindən məhrum olurlar. Onlar isti ailə ocağında deyil, tərk edilmənin, yalnızlığın soyuq divarları arasında böyüyürlər.
Bu addımı atan valideynlər uşaqlardan imtina etməsinin səbəbini daha çox ailənin sosial-iqtisadi durumunun çətin olması ilə əlaqələndirirlər.
Bəs yalnız maddi çətinliklər və sosial şərtlər bir valideynin öz uşağından imtina etməsi üçün yetərli səbəb ola bilərmi?
Mövzu ilə bağlı sosioloq Üzeyir Şəfizadə Bizim.Media-ya danışıb. O, qeyd edib ki, tez-tez rastlaşdığımız belə hallar evlənən cütlüklərin psixoloji və mənəvi baxımdan hazır olmadığının göstəricisidir.
“Heç bir sosial-iqtisadi vəziyyətin çətinliyi valideynin uşağından imtina etməsinə əsas verə bilməz. Uşağa qarşı hüquqları pozmaq, kobud davranmaq, köməksiz vəziyyətdə buraxması üçün heç bir səbəb rəvac verə bilməz. Bu, sadəcə olaraq bəzi insanların öz valideynlik məsuliyyətini başa düşməmək, zövqə düşkün bir həyata meyillənməsi hadisəsidir. İnsanlar öncəliklə valideynlik, ata-analıq missiyasını dərk etməli sonra ailə həyatı qurmalıdır.
O, uşağın mənafeyinə zidd hər hansı bir addım atmamalıdır. Əfsus ki, bəzi hallarda uşağı köməksiz halda buraxmaqla yanaşı yenidoğulmuş körpəni zibilliyə atırlar, imtina edirlər. Bu, həm mənəvi, həm də hüquqi baxımdan yolverilməzdir. Baş verən hadisələr fonunda deyə bilərik ki, belə “valideyn”lər qanunvericilik çərçivəsində valideynlik hüququndan məhrum edilməlidir.
Onların gətirdiyi hansısa arqument imkan vermir ki, uşağı hər hansı sığınacağa təhvil versin. Əgər maddi durumu çətindirsə, o, ünvanlı sosial yardım və digər sisial dəstək paketlərindən istifadə üçün müraciət edə bilər. Bunun üçün dövlət insanlara qayğı nəzərdə tutub. Bütün hallarda dövlət uşaqların ailə mühitində böyüməsində maraqlıdır.
O hesab edir ki, "valideyn"in bu hərəkətləri məsuliyyətsizlik və eqoistliyindən xəbər verir.
“Biz orta və ali məktəblərdə ailə dəyərlərini aşılamalı və təbliğ etməliyik. Gənclərə valideynlik missiyasını izah etməli, böhranlı anlarda ağıla batan çıxış yolları axtarmağa hazırlamalıyıq",- deyə o fikrini yekunlaşdırıb.
