Bankların mobil tətbiqi işimiz xeyli asanlaşdırıb. İstənilən şəxsin kartına qısa müddət ərzində əziyyət çəkmədən pul göndərə bilirik. Lakin kiçik diqqətsizlik bəzən kartın rəqəminin səhv yazılmasına və nəticədə pulun başqa şəxsin hesabına köçürülməsinə səbəb olur. Bəs bu zaman nə etməliyik? Bank həmin pulu geri qaytarırmı?
Məsələ ilə bağlı hüquqşünas Tağı Hüseynov KONKRET.az-a çıqlamasında bildirib ki, istənilən vətəndaş karta pul göndərəndə məlumatlar çıxır:
Tağı Hüseynov
“Belə olan halda banka müraciət edilməlidir. Orada vəkil sorğusu olmalıdır. Yəni şəxs özü müraciət etdikdə, bank cavab verməyəcək. Bu da bir problemdir. Mütləq vəkil sorğusu lazımdır. Vəkil sorğusu ilə banka müracət olunur. Bank hesabın kimə məxsus olması barədə rəsmi məlumat verməlidir. Bankdan bizə təsdiq verilərsə, o halda həmin adamı məhkəməyə verib pulumuzu geri ala bilərik. Bəzən də bank imtina verir. Bildirir ki, bu, sirrdir. Məlumat məxfidir. Belə olan halda isə bankı məhkəməyə veririk. Məhkəmədə bank mütləq iştirak etməlidir. Məhkəmədə bankın üzərinə öhdəlik qoyulur ki, həmin şəxs barəsində məlumat versin. Bank məcbur olub həmin şəxsin məlumatlarını məhkəməyə təqdim edir. Belə halda bank cavabdehlikdən çıxarılır. Həmin şəxsin üzərinə cavabdehlik qoyulur. Vətəndaş artıq səhvən kartına köçürdüyü pulu həmin şəxsdən tələb edə bilir.”
