Millət vəkili, Milli Məclisin İctimai birliklər və dini qurumlar komitəsinin sədri Fazil Mustafa tanınmış ictimai və elm xadimi, filologiya elmləri doktoru, professor Asif Hacılını 65 illik yubileyi münasibətilə təbrik edib.
Təbrik məktubunda Fazil Mustafa professor Asif Hacılının elmi-pedaqoji və ictimai fəaliyyətini yüksək qiymətləndirib. O, yubilyarın alim-pedaqoq, ictimai xadim kimi uzunmüddətli, səmərəli fəaliyyətini, həmçinin Borçalı və Ahısqa türklərinin mədəni irsinin qorunması və təbliğindəki xidmətlərini xüsusi vurğulayıb:
“Hörmətli Asif müəllim,
Sizi 65 illik yubileyiniz münasibətilə səmimi-qəlbdən təbrik edir, möhkəm cansağlığı, ictimai və elmi yaradıcılığınızda yeni uğurlar arzulayıram!
Siz vaxtilə “Borçalı” və “Qaraçöp” cəmiyyətlərinin İdarə heyətinin üzvü, Ahısqa Türkləri “Vətən” Cəmiyyəti Qurultaylarının, I Uluslararası Ahısqa Türkləri Qurultayının nümayəndəsi olmusunuz. Azərbaycan və Türk Diaspor Təşkilatları Rəhbərlərinin I Forumunun iştirakçısı, Dünya Azərbaycanlıları Xartiyasını hazırlayan işçi qrupunun üzvü kimi də mühüm fəaliyyət göstərmisiniz.
Bundan əlavə, Türk Dövlət və Cəmiyyətlərinin X və XI Dostluq, Qardaşlıq və İşbirliyi Qurultaylarında Borçalı və Ahısqa türklərinin problemlərini, özəlliklə milli maarif, mədəniyyət və repatriasiya məsələlərini gündəmə gətirmiş, bu mövzularda məruzələrlə çıxış etmisiniz. Sizin məruzələriniz qurultayların qərarlarında öz əksini tapıb.
Filologiya elmləri doktoru, professor, ədəbiyyatşünas və folklorşünas kimi uzun illər ərzində səmərəli elmi fəaliyyətiniz alim həmkarlarınıza, tələbələrinizə və elm ictimaiyyətinə yaxşı məlumdur. Siz Borçalının, Nayvəlilər ocağının və atanız – görkəmli professor Abbas Hacıyevin mənəvi irsini ləyaqətlə yaşadırsınız.
1986-cı ildən taleyinizi bağladığınız elm və təhsil məbədi – keçmiş M.F.Axundov adına Azərbaycan Pedaqoji Rus Dili və Ədəbiyyatı İnstitutunda (indiki Slavyan Universitetində) müəllimlikdən professorluğa, daha sonra rektorluğa qədər şərəfli bir yol keçmisiniz. Sonrakı dönəmdə Azərbaycan Universitetində Azərbaycan dili və ədəbiyyatı kafedrasının professoru kimi fəaliyyətiniz də təqdirəlayiq olub.
Siz türk xalqlarının arxaik dönəmini, haqlı olaraq, Çin və Sibir qaynaqları əsasında da araşdırmağın, bu sahədə geniş tədqiqatlar aparmağın zəruriliyini vurğulayırsınız. Siz qədim yəhudi mədəniyyəti ilə ümumtürk mədəniyyəti arasında, eləcə də türklərlə amerikan hindularının mədəni irsi arasında paralellər aparmağı təklif edirsiniz. Haqlısınız ki, türk xalqlarının zəngin mədəniyyəti və tarixi hər zaman tədqiqat obyektinə çevriləcək və bu sahədə gələcəkdə də böyük araşdırmalar aparılmalıdır. Yetirmələrinizin bu sahədə doğru yönəlməsində Sizin metodiki vəsaitlərinizin, kitablarınızın önəmli rol oynadığını vurğulamaq istərdim.
Siz qırxa yaxın elmi kitabın, otuza qədər dərsliyin müəllifi, əllidən çox əsərin rus dilindən ana dilimizə tərcüməçisisiniz.
Mifopoetik təfəkkürün fəlsəfi-estetik məsələlərinə, ədəbiyyat tarixinə, çağdaş nəsrin mifopoetik aspektlərinə, bayatıların struktur-semiotik təhlilinə, mifologizm və folklorizm problemlərinə dair monoqrafiyalarınız, eləcə də onlarla elmi məqaləniz böyük maraq doğurur.
“Qəribəm bu vətəndə. Ahısqa türklərinin etnik mədəniyyəti”,
“Ahısqa türk folkloru”, “Qurani-Kərim rus ədəbiyyatında”, “Ahısqa türkləri: Vətən bilgisi”, “Ədəbiyyatşünaslığın tarixi və metodologiyası”, “XX əsr ədəbi düşüncələr tarixi (xatirələr, manifestlər, konseptlər)”, “Bayatı poetikası: struktur, semantika, praqmatika” və b. - Bunlar Sizin elmi irsinizin yalnız bir bölümüdür.
Hörmətli Asif müəllim,
Sizə 65 illik yubileyiniz münasibətilə bir daha ən səmimi təbriklərimi çatdırır, möhkəm cansağlığı, yeni yaradıcılıq uğurları diləyirəm”!
