Azərbaycanda son üç ay ərzində 108 avtomobil yanğın hadisəsi baş verib.
Statistik göstəricilər avtonəqliyyat vasitələrində baş verən yanğınların hələ də ciddi təhlükə yaratdığını göstərir.
Mütəxəssislər bildirirlər ki, avtomobil yanğınlarının əsas səbəbləri arasında elektrik sistemində yaranan nasazlıqlar, yanacaq sızmaları, yüksək temperatur və nəqliyyat vasitəsində siqaret çəkilməsi xüsusi yer tutur. Elektrik naqillərindəki qısaqapanmalar, nasaz akkumulyatorlar və qeyri-peşəkar şəkildə əlavə edilən avadanlıqlar yanğın riskini artıran əsas amillərdən sayılır. Yanacaq sistemindəki sızmalar isə xüsusilə mühərrik bölməsində alovlanmaya səbəb ola bilər. Havanın temperaturunun yüksək olduğu hallarda avtomobildə istilik səviyyəsinin artması və ventilyasiya sistemlərinin düzgün işləməməsi də risk faktorudur. Bundan əlavə, avtomobilin içərisində siqaret çəkmək və ya söndürülməmiş siqaret kötüyünü salonda qoymaq yanğın hadisələrinə səbəb ola bilər.
Mütəxəssislər sürücülərə avtomobillərinin texniki vəziyyətini vaxtaşırı yoxlamalarını, xüsusilə elektrik və yanacaq sistemlərinə diqqət etmələrini tövsiyə edirlər. Hər bir nəqliyyat vasitəsində işlək vəziyyətdə yanğınsöndürən balonun olması vacib hesab olunur. Günəş altında uzun müddət saxlanılan avtomobilləri hərəkətə başlamazdan əvvəl yoxlamaq, salonda alov mənbələrindən istifadə etməmək və siqaret çəkməmək təhlükəsizlik baxımından əhəmiyyətlidir.
Həmçinin avtomobildə təhlükəsizlik çəkici və ilk yardım çantasının olması, fövqəladə hallarda operativ reaksiya göstərmək üçün mühüm sayılır. Yanğın təhlükəsi hiss edilən kimi nəqliyyat vasitəsi dərhal dayandırılmalı, mühərrik söndürülməli və hadisə barədə müvafiq qurumlara məlumat verilməlidir.
Avtomobil yanğınlarının qarşısını almaq üçün maarifləndirmə işlərinin gücləndirilməsi və sürücülərin bu sahədə diqqətli davranması önəmlidir. Təhlükəsizlik qaydalarına əməl etməklə həm öz həyatını, həm də ətrafdakıları qorumaq mümkündür./yenisabah.az
