Bu yaxınlarda Avropa Şurasının baş katibi səviyyəsində Azərbaycan xarici işlər naziri ilə ABŞ-da BMT Baş Assambleyasının toplantısında görüş keçirildi. Bu görüşdə qarşılıqlı dialoq haqqında müzakirələr aparıldı. Amma bunun üzərindən bir neçə gün keçdikdən sonra AŞPA-da Azərbaycanla bağlı “dinləmələr” baş tutdu, almaniyalı ermənipərəst deputat Frank Şvabe kimiləri Azərbaycana qarşı əsassız dinləmələr təşkil etdi.
Turkustan.az xəbər verir ki, bu sözləri Milli Məclisin Beynəlxalq Münasibətlər və Parlamentlərarası Əlaqələr Komitəsinin sədri Səməd Seyidov Teleqraf.com-a geniş müsahibəsində deyib.
O bildirib ki, bu dinləmələrdə birtərəfli mövqe sərgiləmək və əsassız olaraq dialoqdan çəkinmək, beynəlxalq davranışlara zidd yanaşmalar üstünlük təşkil etdi.
S.Seyidov vurğulayıb ki, Azərbaycan heç vaxt hansısa qurum, təşkilat, dövlətlə münasibətləri pozmaqda maraqlı deyil:
“Ölkəmiz özünə qarşı olan qeyri-obyektiv mövqeyə milli maraqlar çərçivəsində cavab verir. Bir daha bəyan edilib ki, AŞPA özünün qərəzli mövqeyindən əl çəkərsə, Azərbaycan normal müstəvidə əməkdaşlığa hazırdır. Bu heç də şəxsiyyətlərarası münasibətlər deyil. Söhbət dövlətlər, təşkilatlararası münasibətlərdən gedir. Ona görə də AŞPA öz mövqeyində korrektələr edəcəksə, Azərbaycanla təzyiq dilində danışmağın mümkünsüzlüyünü başa düşəcəksə, proseslər qaldığı yerdən davam edə bilər. Çünki qarşı tərəf nəhayət anlamalıdır ki, Azərbaycan özünün milli maraqlarını hansısa siyasi konyukturaya qurban verməyəcək”.
