“İndi bütün səylər noyabra qədər müqavilənin imzalanmasına yönəlib. Əvvəlcədən qeyd etməliyəm ki, bu, sülh müqaviləsi olmayacaq, bu, gələcək müqavilənin əsas prinsiplərinin dəqiqləşdiriləcəyi müvəqqəti saziş olacaq”.
Turkustan.az xəbər verir ki, bu sözləri erməni ekspert, tarix elmləri namizədi Sergey Melkonyan bildirib.
Onun sözlərinə görə, müvəqqəti razılaşma ilə hər iki tərəf bir-birinin ərazi bütövlüyünü tanıyacaq, öz siyasətini beynəlxalq hüquq prinsipləri əsasında aparacaqlarına söz verəcək, güc təhdidi olmayacaq, xoş niyyətli olduqlarını nümayiş etdirəcəklər.
“Hər kəs həyəcanlı vəziyyətdə yaşayır. Söhbət təkcə Yaxın Şərqlə bağlı deyil, həm də bölgəmizlə bağlıdır, çünki işlər sürətlə gedir, qərar vermə prosesi çox qısadır. Bir saat ərzində qərar vermək lazım ola bilər. İndi İrəvanda Təhlükəsizlik Şurasının fövqəladə sessiyası və ya iclasları keçirilə bilər. Görürük ki, indi hamı telefon danışığı aparır: Fransa prezidenti İran prezidenti ilə, İran vasitəçilərin köməyi ilə ABŞ ilə, Rusiya, İran, hamı ünsiyyətdədir. Əgər Ermənistan bu ümumi hadisələrin xaricindədirsə, demək ki, hadisələr bizim hesabımıza dəyişə bilər.
Mən heç vaxt istisna etməmişəm ki, Azərbaycan noyabrdan sonra açıla biləcək fürsət pəncərəsindən yararlana bilər. Əgər İran daha çox iştirak edirsə, demək istəyirəm ki, təkcə İsrailə qarşı deyil, həm də Suriya ərazisində, İraqda İranın bizim regionda operativ cavab vermək imkanının azalması ehtimalı çox yüksəkdir. Bizim tərəfdaşlarımız deyirlər ki, İranın regionda status-kvonu saxlamaq üçün ehtiyac duyduğu resurslar buradan heç vaxt ayrılmayacaq”, – deyə o vurğulayıb. /konkret.az/
