İspaniyanın Kordoba Universitetinin arxeoloqları içərisində insanın kremasiya edilmiş (ölmüş şəxsin dini mənsubiyyətinə və milli adət və ənənələrə uyğun olaraq, dəfndən əvvəl meyitin xüsusi sobalarda yandırılması prosesi) sümüklərinin olduğu qədim şərab aşkar ediblər.
Turkustan.az xəbər verir ki, araşdırmanın nəticələri "Journal of Archaeological Science" (JAS) jurnalında dərc olunub.
Qeyd edək ki, 2024-cü ilin əvvəlində arxeoloqlar Əndəlus (İslam hakimiyyətindəki İspaniya torpaqları) mənşəli 2000 illik şüşə qabın içərisində mühafizə olunan qəribə maye aşkar etmişdilər. Alimlər müəyyən ediblər ki, bu, eramızın 4-cü əsrinə aid olan ən qədim şərabdır.
Alimlər mayenin pH, duz və üzvi maddələrini qiymətləndirmək üçün bir sıra kimyəvi sınaqlar keçiriblər. Onlar bir sıra araşdırmalar apardıqdan sonra belə qənaətə gəliblər ki, qabda əslində qırmızı şərab var. Tədqiqatçılar mayedə polifenolları - xüsusi bitki birləşmələrini kəşf edərək buna əmin olublar.
Şərabın tərkibində qızıl üzüklə birlikdə yandırılmış kişi qalıqlarının olduğu da aşkar edilib. Alimlərin fikrincə, qabda kişi qalıqlarının olması Qədim Romada qadınlara şərab içməyin qadağan edildiyini sübut edir. Bu, yalnız kişi içkisi hesab olunurdu. Alimlər izah ediblər ki, qabın içindəki külün tərkibi də dəfn mərasimlərində Roma cəmiyyətinin gender bölgüsünü əks etdirir. (publika.az)
