Ağcabədinin Hindarx qəsəbəsində əsl ailə faciəsi yaşanıb.
Baş verən partlayışda ölənlərlə bağlı ürəkdağlayıcı faktlar məlum olub.
Bizim.Media-ya danışan Hindarx qəsəbə sakini Gülsüm Məmmədovanın sözlərinə görə partlayışda baba, oğul və 2 qız, bir oğul nəvəsi ölüb.
Baba Əhliman Quliyevin qızı Ülviyyə Məmmədli və 2 oğlu Məhəmməd və Murad Məmmədlilər qış tətili olduğundan Bərdənin İmirli kəndindən qonaq gəliblərmiş.
Məlumata görə atasıgilə qonaq gələn Ülviyyənin 2 oğlu ərinin nəslində yeganə övlad imişlər. Ülviyyə və həlak olan qardaşı Bəhruzun həyat yoldaşı Aysun Quliyeva isə ağır xəsarətlərlə xəstəxanaya çatdırılıb.
Xatırladaq ki, bu gün Ağcabədidə yaşayış evində əl qumbarasının partlaması nəticəsində 5 nəfər ölüb, 2 nəfər yaralanıb. Həyatını itirənlərdən 3-ü azyaşlıdır. Hadisənin azyaşlı uşağın çöldə oynayarkən tapdığı əl qumbarasını evə gətirməsindən sonra baş verdiyi bildirilir.
Faktla bağlı araşdırma aparılır.
xxx
Ağcabədidə qumbaranın partlaması nəticəsində 5 nəfərin öldüyü hadisə ilə bağlı bəzi təfərrüat məlum olub.
Turkustan.az “Report”a istinadən xəbər verir ki, azyaşlı uşaq Hindarx qəsəbəsi ərazisində oynayan zaman qumbara tapıb. O, qumbaranı evə gətirib və ailə üzvlərinə verən zaman qumbara açılıb və bu zaman partlayış baş verib.
Nəticədə 5 nəfər ölüb, 2 nəfər isə xəsarət alıb.
Hazırda hadisə yerinə hüquq-mühafizə orqanları cəlb olunub, araşdırma aparılır.
Baş Prokurorluqdan verilən məlumata görə, hazırda prokurorluq əməkdaşları tərəfindən hadisə yeri müayinə olunur və digər zəruri prosessual hərəkətlər icra edilir. Faktla bağlı Ağcabədi rayon prokurorluğunda araşdırma aparılır.
xxx
Ağcabədinin Hindarx qəsəbəsində əl qumbarası partlayıb.
Turkustan.az xəbər verir ki, hadisə nəticəsində 5 nəfərin öldüyü, 2 nəfərin yaralandığı bildirilir.
Ölən və yaralananların bir ailənin üzvləri olduğu qeyd olunur.
Hadisə yerinə hüquq-mühafizə orqanları və təcili yardım göndərilib./modern.az
