Bildiyimiz kimi, saatın yay və qış vaxtına keçidi qaydası bir çox ölkələrdə qalıb. Mövcud məsələ Azərbaycanda da zaman-zaman müzakirə edilir. Hətta bəzi ölkələr bu sistemdən imtina etsə də, sonra yenidən tətbiq etməyə başlayıb. Maraqlıdır ki, 2016-cı ildən ölkəmizdə standart rejim tətbiq olunsa da, bir sıra vətəndaşlar saatın yay və qış vaxtına keçirilməsini dəstəkləyir.
Sistem yenidən tətbiq edilə bilərmi? Ümumiyyətlə, hansı rejim daha faydalıdır?
Globalinfo.az-a danışan ekoloq Ənvər Əliyev deyib ki, əslində, tam subtropik olmayan və mülayim iqlim qurşağında Günəşin çıxması və batması məsələsi problemdir.
O düşünür ki, saatın qış və ya yay vaxtına keçirilməsi önəmli deyil:
Ənvər Əliyev
“Bu, artıq bizdə stabilləşib. Hazırda ölkədə nə zavod, nə fabrik, nə növbəli sistem var. Əvvəl 3 növbəli iş rejimləri olurdu, amma bunlar keçmişdə qalıb. Saat dəyişiləndə qrafik və rejim də dəyişir. Əvvəl nizam-intizam var idi, indi qayda-qanunda boşluqlar mövcuddur. Əgər biz hazırkı saat rejiminə vərdiş etmişiksə, yenidən dəyişmək məsləhət deyil. Təbii ki, hökumət qərar versə, dəyişəcək”.
İqlimşünas Məhərrəm Mehdiyevin sözlərinə görə, keçmiş zamanda insanlar saat olmadan rahat yaşayıblar:
“Baxın, saatlar icad olunmayana qədər insanlar işlərini rahat tənzimləyirdilər. Məsələn, əcdadlarımız saatsız yaşayıblar. Hətta onlar Ramazan ayında havaya uyğun sübh vaxtı imsaka oyanar, birinci ulduz görünəndə axşam iftar edərdilər və sair. Yəni dünyəvi və təbiətə uyğun yaşayıblar. Ona görə də fikrimcə, saat dəyişməkdə nəsə xeyirli bir şey yoxdur. Əksinə, bəlkə də ziyanı var”.
Məhərrəm Mehdiyev
İqlimşünas deyib ki, saatı dəyişməyə ehtiyac yoxdur:
“Əvvəl dədə-babalarımız necə yaşayıbsa, ona uyğun da biz yaşaya bilərik. İnsan təbiətin verdiyi Günəş, işıq, gecə, gündüz vaxtlarına görə yaşamalıdır. Bunu isə saat tənzimləmir. Bunları nəzərə alıb, saatı olduğu qaydada saxlamaq lazımdır”.
