“AzerGold” QSC-nin yerli qızıldan hazırlanan sikkə və külçələrinin pərakəndə satışında fasilə yaranıb. Ötən gün Azergold.gift saytının "Məhsullar" bölməsində qızıl sikkə və külçə məhsulları barədə məlumatlar yığışdırılıb. Hazırda isə onlayn şəkildə qızıl sikkə məhsulları almaq bərpa olunsa da, külçə almaq mümkün deyil.
Marja.az-ın yazdığına görə, həmçinin, hazırda Bakıda Bülbül prospekti, 3 ünvanında yerləşən "AzerGold" Satış və mübadilə mərkəzində də qızıl sikkə və külçə məhsullarının satışı mövcud deyil. Bir çox ekspertlərin fikrincə, bu amil bazarda qızılın qiymətinin kəskin artması və bu tempin sürətlə davam etməsi ilə bağlıdır.
Mövzu ilə bağlı Yenisabah.az-a danşan iqtisadi-ekspert Natiq Cəfərli də bu faktı təsdiqləyib:
“Bəli elədir, tamamilə doğrudur. Yaxın zamanda qızıl qiymətlərində ciddi artım gözlənilir. 1 unsiya üçün psixoloji hədd 3 min dollar idi. Lakin qiymətlər bu rəqəmi çoxdan keçdi. Artıq 1 unsiyanın qiyməti 3100 dollardan da yuxarıdır. Bunun səbəbi dünyadakı iqtisadi təlatümlərlə əlaqəlidir. Bir çox böyük şirkətlərin səhmlərində ciddi ucuzlaşma oldu. İnvestorların bir çoxu öz vəsaitini qorumaq üçün səhmlərini sataraq qızıla yatırım etməyə başladılar".
Ekspertin sözlərinə görə, qızıl qiymətindəki bahalaşma yayadək davam edəcək:
“Fikrimcə, maksimal qiymət təqribən 3200-3400 dollar arası dəyişə bilər. Bundan yuxarı həddə qızılın özünün bir aktiv kimi mənası da azalır. Ən azı yay aylarına qədər bahalaşma gözlənilir. Ondan sonra çox güman ki, bazarda qiymətin sabitləşməsinin də şahidi ola bilərik”.
