İranın ali rəhbəri Əli Xameneiyə tabe olan radikal “Keyhan” qəzeti məqaləsində ABŞ prezidentinin İrana hücumla bağlı xəbərdarlıqlarına cavab olaraq Donald Trampı qətlə yetirməklə hədələyib.
“Tramp çox səhv edib! Qasım Süleymaninin qisasını almaq və Trampın boş başına bir neçə güllə sıxmağın vaxtı çatıb!” - deyə, qəzetdə vurğulanıb.
Bununla da ABŞ-İran arasında olan gərilmə pikk həddə çatıb. Həmçinin bu gün İsrailin baş naziri Benyamin Netanyahu açıqlama verərək bildirib ki, tezliklə Vaşinqtona, Trampın görüşünə gedəcək. Müzakirə ediləcək mövzular arasında İran da var.
Maraqlıdır görəsən, bu yolun sonu İran-ABŞ müharibəsinin başlanmasına gətirib çıxaracaq? Turkustan.az olaraq bu sualı siyasi şərhçi Məhəmməd Əsədullazadəyə ünvanladıq. Ekspert bildirdi ki, İranla-ABŞ arasında nüvə məsələsi ciddi şəkildə fikir ayrılığı yaratdığı üçün, qarşıdurma riski günü-gündən artır.
Amerika Birləşmiş Ştatları hind okeanına və İran ətrafına yeni raketlər, gəmilər göndərir. İran da artıq silahlı qüvvələrini döyüş hazırlığına gətirib. Amma hələ ki, Netanyahunun ABŞ-a səfəri müharibənin başlana biləcəyi ehtimalını vermir. İsrail tərəfi də bildirir ki, biz bu məsələnin diplomatik yolla həllinə tərəfdarıq. Əgər ABŞ-İran arasında müəyyən bir danışıqlar, dialoqlar baş tutarsa, düşünürəm ki, Tramp güzəştə gedə bilər. Məlum olduğu kimi İran da öz dediyindən dönmür və dəfələrlə bəyan edir ki, bu bizim "qırmızı xətti"mizdir. Düşünürəm ki, danışıqlar gedəcək və ölkələr bir çıxış yolu tapacaq. İrana qarşı hərbi müdaxilə də birdən-birə həyata keçirilməyəcək. Əgər danışıqlar növbəti 6 ay ərzindən mümkün olmayacaqsa, bəli hərbi qarşıdurma ehtimalı real ola bilər.
Aytən Yaşar/ Turkustan.az
