Moskva “Rus evi” ilə bağlı məsələnin həll olunacağına əmindir, lakin...
“Rusiya Azərbaycanda ”Rus evi" ətrafında yaranmış vəziyyətin həll olunacağına əmindir". Bunu RİA Novosti agentliyinə müsahibəsində Rusiya xarici işlər nazirinin müavini Mixail Qaluzin deyib.
“Mən əmin olduğumu bildirmişəm ki, biz həll yolunu tapacağıq. Bunun üçün dialoq aparmalıyıq. Biz Azərbaycanla bunu heç vaxt dayandırmamışıq”, - diplomat vurğulayıb.
Qaluzinin fikrincə, Moskva və Bakını müttəfiqlik əlaqələri birləşdirir və bu, artıq çox şeydən xəbər verir. O qeyd edib ki, Rusiya humanitar və mədəni əməkdaşlıq da daxil olmaqla, bütün yaranan məsələlərin həllini bu ruhda gözləyir. “Müttəfiqlərin əməkdaşlığı mədəni və humanitar sahədə genişmiqyaslı, müxtəlif mübadilələri və inkişafı nəzərdə tutur”, - o əlavə edib.
Nazir müavini “iki ölkənin çoxəsrlik ortaq tarixini və mədəniyyətlərin dərin qarşılıqlı nüfuzunu” xatırladıb. “Mən əminəm ki, bu prinsiplərdən çıxış edərək, biz ”Rus evi" probleminin qarşılıqlı məqbul həllini tapacağıq", - Qaluzin yekunlaşdırıb.
Rusiya niyə “Rus evi”ndə bunca təkid edir? Paytaxtda uzun illər qanunsuz fəaliyyət göstərmiş “Rus evi”nin, Rusiyanın Azərbaycandakı faktiki “gözü”nün açılmasına izin veriləcəkmi?
Çingiz Qənizadə
Demokratiya və İnsan Hüquqları Komitəsinin rəhbəri Çingiz Qənizadə “Yeni Müsavat”a bildirdi ki, Azərbaycan tərəfi dialoqa həmişə hazırdır. “Biz Azərbaycan Respublikasının ərazisində fəaliyyət göstərən təşkilatların Respublikamızın qanunlarına uyğun formada fəaliyyət göstərməsinin tərəfdarıyıq”, Ç.Qənizadə dedi. O bunları əlavə etdi: “Təbii ki, icazəli şəkildə olmalıdır. Xarici dövlətlərin hər hansı bir təşkilatı, ofisi Azərbaycanda varsa onun fəaliyyəti, hətta üzərində yazılan adı Azərbaycan qanunvericiliyinə uyğun olmalıdır. Amma ”Rus evi" qanunlarımızı pozmuşdu. Yerləşdiyi binanın, ofisin adının yazılışından tutmuş, fəaliyyətinə qədər bir çox məsələlər qanunvericilikdə nəzərdə tutulduğu kimi deyildi. Ona görə də Azərbaycan tərəfi bununla bağlı qanunun tələbinə uyğun addımlar atmalı oldu. Rusiya tərəfi hesab edir ki, yaranmış vəziyyətin həll olunması ilə bağlı danışıqlar aparılmalıdır, əməkdaşlıq davam etməlidir və problemin həlli yolu tapılmalıdır. Biz də buna razıyıq. Bunun həlli yolu Azərbaycan qanunlarına uyğun fəaliyyətdən keçir. Əgər Rusiya tərəfi yenə əvvəlki hər hansı bir nəzarət olmadan adıçəkilən məkanın fəaliyyətini təmin etmək istəyirsə bu, artıq başa düşülən deyil".
Qeyd edək ki, “Rossotrudniçestvo”nun Azərbaycandakı nümayəndəliyi olan Rusiya İnformasiya-Mədəniyyət Mərkəzi - “Rus evi”nin hüquqi şəxs qismində qeydiyyatının mövcud olmadığı və təşkilatın Azərbaycan qanunvericiliyini ciddi şəkildə pozduğu barədə Rusiya tərəfinə məlumat verildikdən sonra, 3 fevral 2025-ci il tarixində “Rus evi”nin fəaliyyətinə xitam verilməsi barədə Rusiya tərəfinə nota göndərilib. Bakıdakı “Rus evi” isə 11 fevral 2025-ci ildə açıqlama yayaraq, Azərbaycan Respublikası Xarici İşlər Nazirliyinin tələbi ilə əlaqədar, “Rossotrudniçestvo”nun nümayəndəliyinin-Bakıdakı “Rus evi” öz fəaliyyətini dayandırdığını bildirib. Təyyarə qəzasından sonra Azərbaycan-Rusiya münasibətlərində müşahidə edilən soyuqluq “Rus evi”nin bağlanmasından sonra bir qədər də gərginləşib. Lakin gərginlik mart ayından etibarən yumşalmağa başlayıb.
