Aprelin 2-də Prezident İlham Əliyevin ölkəmizdə səfərdə olan Almaniya Prezidenti Frank-Valter Ştaynmayerlə mətbuata birgə bəyanatında sülh prosesinə dair sözləri diqqət çəkib.
Dövlət başçısı bu günə qədər sülh müqaviləsinin mətninin tam razılaşdırıldığını təsdiqləyib və onun 17 paraqrafdan ibarət olduğunu bildirib. Prezident vurğulayıb ki, Azərbaycan burada hər hansı bir əlavə şərt irəli sürmür, hər şey Ermənistana bəllidir.
İlham Əliyev rəsmi İrəvanın Bakının irəli sürdüyü ATƏT-in Minsk qrupunun ləğvi və Ermənistan konstitusiyasının dəyişdirilməsi tələbləri ilə bağlı hər hansı ciddi addım atmadığını qeyd edib. O, mövcud konstitusiyanın Azərbaycana qarşı ərazi iddialarını şərtləndirdiyini, bu səbəbdən dəyişdirilməli olduğunu söyləyib.
Globalinfo.az-a danışan politoloq Elxan Şahinoğlu deyib ki, sülh sazişinin 17 bəndi razılaşdırılsa da, müqavilədən əlavə ortaq məxrəcə gəlinməsi mütləq olan iki məsələ də var:
“Prezident İlham Əliyev almaniyalı həmkarı ilə görüşdə sözügedən məsələləri bir daha diqqətə çatdırdı. Bunlar ATƏT-in Minsk qrupu ləğv edilməsi və Ermənistan konstitusiyasının dəyişdirilməsidir.
Elxan Şahinoğlu
Rəsmi İrəvan bu tələbləri yerinə yetirməlidir, məsələdən qaçış, ya da yayınma imkanları yoxdur. Ölkə başçısının qeyd olunan istiqamətdə mövqeyi də çətin ki, bundan sonra dəyişsin. Lakin Bakının iki tələbi də yerinə yetirilərsə, sülh müqaviləsi imzalana bilər.
Bu iki bənd ona görə sülh sazişinin mətninə salınmayıb ki, müqavilə daha da mürəkkəbləşməsin. Lakin ən az 17 bənd qədər mühüm və vacibdir. Ona görə də, İrəvan ən qısa zamanda bu tələblərə riayət etməli, sülh imzalanmalıdır”.
Qeyd edək ki, Almaniya prezidenti ölkəmizə gəlmədən öncə Ermənistana səfər edib. Burada baş nazir Nikol Paşinyan və hökumət nümayəndələri ilə görüşüb.
