ABŞ-da milli təhlükəsizliyi təhdid edən ticarət balanssızlığına görə fövqəladə vəziyyət elan edilib. Bunu ölkə Prezidenti Donald Tramp bəyan edib.
“Bu təhlükənin mənbəyi Birləşmiş Ştatlardan kənarda, əsas ticarət tərəfdaşlarının daxili iqtisadi siyasətlərində və qlobal ticarət sistemindəki struktur disbalansındadır. Mən bu təhlükə ilə bağlı milli fövqəladə vəziyyət elan edirəm” , – o deyib.
Bu vəziyyət ölkənin iqtisadi dayanıqlılığına necə təsir edə bilər? Fövqəladə vəziyyət ABŞ-ın xarici ticarət tərəfdaşları ilə münasibətlərinə hansı təsirləri göstərəcək?
Globalinfo.az-a danışan politoloq Məhəmməd Əsədullazadə deyib ki, Tramp dünya ticarət müharibəsinə başlayıb:
“Strateji tərəfdaşlarına rüsum tətbiq edib, Rusiyanı kənarda saxladı. Azərbaycana da rüsum tətbiq edib. O, bununla ABŞ iqtisadiyyatına böyük zərbə vurur. Həmçinin ABŞ-ın etibarlı müttəfiqliyini və etimadlığını sual altına qoyur. Faktiki olaraq ABŞ öz müttəfiqləri ilə ticarət müharibəsi aparır”.
M.Əsədullzadə qeyd edib ki, növbəti dörd il ərzində ABŞ-ın geosiyasi və geoiqtisadi mövqeyi zəifləyə bilər:
“Bu ölkə müttəfiqləri ilə sıx əməkdaşlıq və güzəştlər səbəbindən beynəlxalq güc olmuşdu. Hazırda ABŞ öz müttəfiqlərini rəqib kimi görür. Baş verənlər Çinin beynəlxalq iqtisadi maraqlarının güclənməsinə gətirib çıxaracaq”.
