Xəbər verdiyimiz kimi, Ermənistanın Baş naziri Nikol Paşinyan, ölkəsinin keçmiş prezidentlərini yenidən hədəf alıb və onları ittiham edib. Paşinyan, 2020-ci il Qarabağ müharibəsindəki məğlubiyyətin məsuliyyətini üç sabiq prezidentə – Levon Ter-Petrosyan, Robert Köçaryan və Serj Sərkisyana aid edib.
Bu, birinci hal deyil. Paşinyan tez-tez sabiq prezidentləri bu qəbildən ittihamlarla gündəmə gətirir.
Bu vəziyyətin yaranma səbəbi nədir? Ermənistanın Rusiyaya bağlı müxalifətinin fəallaşması, ya başqa amillər?
Globalinfo.az-a danışan siyasi şərhçi Elmir Səftərov deyib ki, Ermənistanın Baş naziri Nikol Paşinyanla bu ölkənin köhnə prezidentləri arasındakı münasibətlər İkinci Qarabağ müharibəsindən sonra daha kəskin xarakter almağa başladı:
“Belə ki, Ermənistanın təslimçi məğlubiyyəti fonunda işğalçı dövlətin hazırkı baş naziri və köhnə liderləri bir-birlərini təqsirləndirməklə 2026-cı ilə planlaşdırılan parlament seçkilərində xal qazanmağa çalışırlar.
Müharibədən sonra da Nikol Paşinyana edilən təzyiqlər 2023-cü ilin sentyabrındakı antiterror tədbirlərindən sonra artsa da, dövlətin yükü müəyyən qədər azaldı. Çünki Ermənistan dövləti qəbul etməsə də, hər zaman Azərbaycanın Qarabağ bölgəsindəki qondarma quruma hərtərəfli dəstək göstərirdi.
Azərbaycan dövlət suverenliyini bərpa etdikdən sonra isə Nikol Paşinyan ölkəmizə qarşı əlində heç bir siyasi təzyiq vasitəsinin qalmadığını anladı və normallaşmaya və güzəştlərə getməyə məcbur oldu. Sabiq prezidentlər isə 30 il ərzində müxtəlif dövlətlərin dəstəyi ilə əlində saxladıqları Azərbaycan torpaqlarının itirilməsini bu gün də qəbullana bilmədikləri və köhnə müttəfiqlərindən uzaqlaşmağa doğru getdikləri üçün Nikol Paşinyanın ölkə daxilində reputasiyasını heçə endirməyə çalışırlar”.
Elmir Səftərovun sözlərinə görə, köhnə prezidentlərlə hazırkı baş nazir arasındakı münasibətləri pisləşdirən digər məqamlardan biri də 2024-cü ilin dekabrında Nikol Paşinyanın keçmiş Dağlıq Qarabağ münaqişəsinin həlli ilə bağlı bir sıra şərhlər dərc etməsindən sonra genişləndi:
“O, 1994-cü il atəşkəsindən sonra danışıqların yalnız “Dağlıq Qarabağın Azərbaycana qaytarılması” üzərində getdiyini iddia edib. Bəyanat, xüsusilə Ermənistanın keçmiş liderlərinin müttəfiqləri və partiya üzvləri tərəfindən tənqidə səbəb oldu və onlar iddianı qəti şəkildə rədd etdilər.
Nikol Paşinyanın rəqibləri və sabiq prezidentlər 2021-ci ildəki seçkiqabağı təşviqat kampaniyasında Qarabağa yenidən iddianı onun vədi kimi gündəmə gətirir, hazırda bu məsələdən geri durmağı isə bir növ baş nazirin xalqı aldatması kimi təqdim edirlər.
Bundan əlavə, onlar erməniləri inandırmağa çalışır ki, Nikol Paşinyanın səriştəsizliyi nəticəsində sülhə gedən yolda təkcə Ermənistan güzəştə getməyə məcbur edilib.
Bəzi müxaliflər bu sövdələşməni 2020-ci ildəki kapitulyasiyadan sonra “ikinci təslimiyyət” kimi qələmə verirlər.
Nikol Paşinyanın şərhləri Azərbaycanla Ermənistan arasında otuz ildən çox davam edən münaqişədən sonra tarixi sülh sazişinin şərtlərini razılaşdırdıqlarını elan etməsindən bir neçə həftə sonraya təsadüf etməsi də diqqətləri cəlb edir.
Nikol Paşinyan, həmçinin bununla müxalifəti ciddi şəkildə zəiflətməyə, xarici siyasətdəki və dövlət qanunvericiliyindəki dəyişiklikləri rahatlıqla həyata keçirtməyə, addımlarını sərbəst atmağa və onların təzyiqlərindən qurtulmağa çalışır”.
