““Melissa Group” kimi tikinti şirkətləri başa düşmürlər ki, dövlətin imicinə nə qədər böyük zərbə vururlar. Bəzən Rusiya boyda böyük dövləti qeyri-hüquqi dövlət olmaqda günahlandırırlar. Yadımdadır ki, Moskva ətrafında 109 kilometrlik dairəvi yol var idi. Beşinci yol salınanda bir nəfər qoca vətəndaşın sahəsindən keçirdi. Onun evinin sökülməsi üçün nə qədər pul təklif etdilər, nə etdilərsə, olmadı. Axırda yolu evin kənarından saldılar, vətəndaşın evini uçurmadılar. Halbuki dövlət əhəmiyyətli yol idi. Başqa dövlətlərdən də bu cür nümunələr gətirmək olar. “Melissa” isə özəl tikinti şirkətidir. Belə özbaşınalıqlar Azərbaycanda tez-tez təkrar olunur. Hər hansı bəhanə gətirmək, “işçilərin günahıdır” demək - hamısı yalandır. Hər biri tamahkarlıq məqsədi ilə görülən işlərdir. İnsanların psixologiyasına, onların sağlamlıqlarına, rahat həyat tərzinə zərbə vurur. Bu, vətəndaş və dövlət münasibətlərinə də xələl gətirir. Tikinti şirkətləri məsuliyyətli olmalıdırlar. Əks halda, onları hüquqi cəhətdən məsuliyyətə cəlb etmək lazımdır. Daxili İşlər Nazirliyi məsələ ilə bağlı araşdırma aparır. Bu, çox yaxşı haldır. Belələri məsuliyyətə cəlb olunmalıdırlar”.
Bu sözləri Pravda.az-a açıqlamasında sabiq deputat, Vəhdət Partiyasının sədri Tahir Kərimli deyib.
“Xalqa bu qədər zərbə vurmaq olmaz. Vətəndaş iki milyona yox, on milyona razılaşır. Sənə nə dəxli? İcazə vermir, onun şəxsi mülkiyyətidir, müqəddəsdir. 1990-cı illərin əvvəllərində ABŞ-də olanda 102 mərtəbəli binanın sakini 73 yaşlı qadın idi. Onu həbs etmişdilər ki, vergini ödəməyib. Soruşdum ki, nə məsələdir. Dedilər ki, Amerikada iki şey müqəddəs sayılır - mülkiyyət və vergi. Sənin mülkiyyətinə toxunulsa, milyon qatını məhkəmədə tələb etmək hüququn var. Mülkiyyətin varsa, vergini də verməlisən. Amerika dili ilə desək, mülkiyyət və vergi müqəddəs, toxunulmaz olmalıdır”, - T.Kərimli bildirib.
