“Rusiya Prezidenti Vladimir Putinin üzr istəməsindən sonra kompensasiya ödəyəcəyini düşünürəm. Mənə elə gəlir ki, istintaq yekunlaşdıqdan sonra Moskva addım atacaq”.
Bu sözləri Globalinfo.az-a sabiq xarici işlər naziri Elmar Məmmədyarov dekabrın 25-də Bakı-Qroznı reysini yerinə yetirən təyyarənin Aktau şəhəri yaxınlığında qəzaya uğraması və Rusiyanın Azərbayacana kompensasiya ödəyəcəyi barədə danışarkən deyib.
Onun sözlərinə görə, beynəlxalq qanuna uyğun olaraq bir ay ərzində ilkin hesabat təqdim olunmalıdır:
“12 ay müddətində isə tam hesabat veriləcək. Yəqin ki, onun əsasında kompensasiya məsələsi də öz həllini tapacaq. Həlak olanların yaxınlarına, xəsarət alanlara Rusiya kompensasiya ödəməli olacaq. Eyni zamanda təyyarənin qiyməti də danışıqlar mövzusudur. Rusiya tərəfi artıq günahı üzərinə götürüb”.
Sabiq nazir Çeçenistan başçısı Ramzan Kadırovun qardaşı oğlunun cəzalandırılmasının mümkünlüyü barədə verdiyimiz sualı da cavablandırıb.
Deyib ki, baş verən hadisədə əli olan hər kəs mütləq cəzalandırılmalıdır:
“Çeçenistan rəhbəri Ramzan Kadırovun qardaşı oğlunun cəzasına gəlincə, bunlar istintaq yekunlaşdıqdan sonra məlum olacaq. Kim tapşırıq verib, kim vurub, hadisə necə baş verib, hamısı araşdırılacaq. Bunun üçün vaxt lazımdır. İndi hələ nəsə demək tezdir. Məhkəməyə müraciət etmək üçün isə istintaqın sona çatmasını gözləməliyik”.
Elmar Məmmədyarov Rusiya-Azərbaycan münasibətlərinə toxunub:
“Baş verən hadisənin bizim Rusiya ilə münasibətlərimizə mənfi təsir edəcəyini düşünmürəm. Çünki belə xoşagəlməz hallar başqa ölkələrdə də olub. Məsələn, 44 günlük müharibə dövründə biz də yanlışlıqla Rusiyanın hərbi helikopterini vurmuşduq, Türkiyə Rusiyaya məxsus təyyarəni, İran Ukrayna təyyarəsini vurmuşdu. Sadəcə, məsələyə gərək soyuqqanlı yanaşasan və anında həll edəsən. Vladimir Putin də baş verənləri tam şəkildə anlayır. Ona görə də iki gündən bir İlham Əliyevə zəng edir. Günahını etiraf etməsə, zəng etməzdi hər halda. Zəng edirsə, deməli, səhvini anlayır”.
