Vl çağırış Milli Məclisin Mədəniyyət Komitəsinin sədri Fazil Mustafa Azərbaycan Respublikasının Əməkdar elm xadimi, ATATÜRK Mərkəzinin müdiri, Mədəniyyət Nazirliyi yanında İctimai Şuranın sədri, Akademik Nizami Cəfərovu qarşıdan gələn 65 illik yubileyi ilə bağlı təbrik edib.
Təbrik məktubunda yubilyar alimin çoxşaxəli elmi, ictimai fəaliyyətinin ən ümdə məqamlarına vurğu edilib:
“Hörmətli Nizami müəllim,
Sizi – tanınmış ictimai və elm xadimini qarşıdan gələn 65 illik yubileyinizlə bağlı təbrik edir, Sizə möhkəm cansağlığı, yeni uğurlar diləyirəm!
Siz, onlarla kitabın müəllifi, həmmüəllifi, tərtibçisi, elmi redaktoru, rəyçisi, eləcə də, yüzlərlə məqalənin müəllifi, habelə orta və ali məktəblər üçün dərsliklərin yazarı, onlarla alimin elmi rəhbəri olaraq, məhsuldar elmi yaradıcılıq yolu keçmisiniz. Vaxtilə təhsil aldığınız doğma Bakı Dövlət Universitetində pedaqoji fəaliyyətiniz, kafedra müdiri və dekan olaraq uzunmüddətli, səmərəli xidmətləriniz unudulmazdır.
2001-ci ildən Azərbaycanda ATATÜRK Mərkəzinin müdirisiniz. Mərkəz artıq Türk dünyasının Bakıdakı əsas ziyarət ünvanlarından birinə çevrilib.
II, III, IV, V və VI çağırış Azərbaycan Respublikası Milli Məclisinin üzvü, 2005-ci il dekabrın 2-dən 2015-ci il noyabrın 24-dək Milli Məclisin Mədəniyyət Komitəsinin sədri, VI çağırışda isə Mədəniyyət Komitəsinin üzvü olmusunuz. Milli Məclis yanında Toponimiya Komissiyasının üzvü, Azərbaycan-Bəhreyn parlamentlərarası əlaqələr üzrə işçi qrupunun rəhbəri, Qazaxıstan, Qırğızıstan, Türkiyə, Efiopiya, Livan, Küveyt parlamentləri ilə əlaqələr üzrə işçi qruplarının, TÜRKPA-da Azərbaycan nümayəndə heyətinin üzvü olaraq səmərəli fəaliyyətiniz təqdirəlayiqdir.
Siz, bir dilçi, ədəbiyyatşünas olaraq, ölkəmizlə yanaşı, haqlı olaraq, bir çox qardaş ölkə və topluluqda mötəbər imza sahibi kimi tanınırsınız.
Toplumda öz xeyirxahlığı, səmimiyyəti ilə seçilən aydınlarımızdansınız.
Elmi, ictimai xidmətlərinizi yüksək qiymətləndirən dövlətimiz Sizi Əməkdar elm xadimi fəxri adı, “Şöhrət” ordeni və bir sıra medallarla təltif edib.
Sizi 65 illik yubileyiniz, ictimai, elmi yaradıcılıq uğurlarınızla bağlı bir daha təbrik edir, ən xoş diləklərimizi yetirirəm”!
