Akif Təvəkküloğlu yeni vəzifəyə TƏYİN OLUNDU

Əməkdar jurnalist Akif Təvəkküloğlu yeni vəzifəyə təyin olunub.
Turkustan.az saytının xəbərinə görə, Akif Təvəkküloğlu Əqli Mülkiyyət Agentliyi İdarə Heyəti sədrinin müşaviri vəzifəsinə təyinat alıb.
Qeyd edək ki, bu təyinatadək Akif Təvəkküloğlu Azərbaycan Respublikası Həmkarlar İttifaqları Konfederasiyasının Mətbuat xidməti və İctimaiyyətlə əlaqələr şöbəsinin rəisi vəzifəsində çalışırdı.
O, daha əvvəl - 2006-2020-ci illərdə Milli Məclisin mətbuat katibi vəzifəsində işləyib.
Akif Təvəkkül oğlu Nəsirov 1962-ci il dekabrın 1-də İmişli rayonunda anadan olub. Orta məktəbi 1979-cu ildə bitirib.
1981-ci ildə Azərbaycan Dövlət Universitetinin Kitabxanaşünaslıq və biblioqrafiya fakültəsinə daxil olub. 1986-cı ildə həmin fakültəni fərqlənmə diplomu ilə bitirib. 1986-cı ildən 1991-ci ilədək Azərbaycan Dövlət Kitab Palatasında filial müdiri, sonra isə şöbə müdiri vəzifələrində çalışıb.
Jurnalist karyerasına 1991-ci ildə "Molla Nəsrəddin" jurnalından başlayıb. Daha sonra fəaliyyətini televiziyada davam etdirib və 2006-cı ilədək Azərbaycan Dövlət Teleradio Verilişləri Şirkətində müxtəlif vəzifələrdə çalışıb.