Kreml: “Ermənistan Rusiyadan aldığı məlumatları Qərb xüsusi xidmət orqanlarına ötürür”

Kreml: “Ermənistan Rusiyadan aldığı məlumatları Qərb xüsusi xidmət orqanlarına ötürür”

Paşinyan administrasiyasının son dönəmlər yeritdiyi siyasətin Kremldə qıcıq yaratdığı aydın şəkildə görünür. Doğrudur, xeyli müddət Rusiya İrəvanın bu “dəcəlliyi”nə müəyyən qədər göz yummağa çalışırdı.

Lakin artıq Kremlin səbr kasasının dolub-daşdığı özünü daha açıq büruzə verir. Artıq Rusiya hakimiyyətinə yaxın mənbələr Ermənistanın xəyanətini sərt dillə tənqid etməyə başlayıblar.

Son olaraq “Nezıqar” teleqram kanalında yazılan təhlil yazısı Kremlin İrəvana qarşı mövqeyini ortaya qoydu. Teleqram kanalının bu qədər ciddi mənbə kimi qəbul edilməsinin səbəbi isə, onun Kremlə yaxın mənbə olduğunun hər kəs tərəfindən bilinməsidir. Bundan əvvəl də Moskvanın siyasəti ilə bağlı kanalda yayımlanan proqnozlar mütləq olaraq özünü doğruldub. 

Seçim edildi: “Ermənistan Rusiyanın kürəyinə bıçaq sancdı” 

Məqalədə Ermənistan Təhlükəsizlik Şurasının katibi Armen Qriqoryanın NATO nümayəndələri ilə görüşünə və bu fonda İrəvanın Rusiyaya arxa çevirməsinə xüsusi diqqət ayrılıb. Təhlil geniş olduğundan bir sıra xüsusi məqamları diqqətinizə çatdırmağı daha lazımlı hesab etdik: 

1. Ermənistan artıq iki kresloda eyni anda oturmaq siyasətini dayandırıb və Rusiyaya tamamilə üz çevirib.

2. İrəvanın KTMT-də üzvlüyünü davam etdirəcəyi sual altındadır.

3. Moskvanın son sərhəd münaqişəsində Azərbaycanın haqlı mövqeyini dəstəkləməsi Ermənistanın xoşuna gəlmədi.

4. Rusiya xüsusi xidmət orqanlarının işi ilə bağlı məlumatlar Qərbin xüsusi xidmət orqanlarına ötürülür və bu heç də sirr deyil.

Sonuncu qeyd etdiyimiz məqama daha çox diqqət yetirməkdə fayda var. Çünki bu faktiki olaraq Kreml, daha dəqiqi heç bir böyük güc üçün qəbul edilə biləcək məsələ deyil. Bu, müttəfiqə qarşı açıq xəyanətdir və Ermənistan faktiki olaraq Moskvanın əlehinə casusluqla məşğuldur.

Eyni zamanda biz, Rusiyanın xarici siyasətinə diqqət yetirsək, bunun nə qədər təhlükəli nəticələrinin ola biləcəyini görə bilərik. Əvəzində Moskva üçün balanslı siyasət yürüdən ölkələr məqbul tərəfdaş (Azərbaycan və Türkiyə) hesab olunur.

Digər tərəfdən düşünülə bilər ki, Rusiyanın başı Ukraynaya qarışıb, ona görə də Ermənistan onun üçün önəmsiz detaldır. Lakin bu heç də doğru yanaşma deyil. Çünki Kreml Cənubi Qafqaz kimi strateji regiondakı forpostunu, özü də belə bir çətin məqamda itirməyi qəbullana bilməz. Yəni, Paşinyanı törətdiyi cinayətin cəzası gözləyir.

Bəs, Rusiyanın Ermənistana cəzalandırması Azərbaycana nə qazandıracaq?

Bundan təkcə Azərbaycan qazanmayacaq, çünki bütün regionda sülh bərqərar olacaq. Bu gün Cənubi Qafqazda sülhün təmin olunması istiqamətində Azərbaycan və Rusiyanın maraqlarında ortaq nüansların sayı olduqca çoxdur. Xüsusən də, Zəngəzur dəhlizi məsələsində.
Hətta əminliklə deyə bilərik ki, koridorun ən qısa müddətdə açılması Azərbaycandan çox sanksiyalardan əziyyət çəkən Moskvaya lazımdır.

Zəngəzur düyünün açılması isə faktiki olaraq sülhə gedən yolun açılmasıdır. Rəsmi Bakının da istəyi məhz budur.

İndiki şəraitdə Moskvanın kürəyinə sancılan bıçaq Paşinyanın başı üzərindəki “Domokl qılıncı”na çevrilib. Nikol tez bir zamanda sülhə razılaşmalıdır. Sülhün formulu da Azərbaycanın təqdim etdiyi 5 baza prinsipindən keçir. (bizim.media)


MANŞET XƏBƏRLƏRİ