Medianın İnkişafı Agentliyinin şöbə müdiri tarixçi, yazıçı-publisist Natiq Məmmədli İctimai TV-yə müsahibəsində maraqlı açıqlamalar verib.
Turkustan.az xəbər verir ki, şöbə müdiri ciddi mediada reketlik kimi neqativ halların olduğunu vurğulayıb: "Belə təəssürat yaranmasın ki, reket jurnalistikası sanki bizdən ayrıdır. Bu, belə deyil. Biz reket media haqqında üçüncü şəxs kimi danışıq, amma reket elementləri ilə peşəkarcasına məşğul olanların əksəriyyəti bizim ciddi media subyektlərində oturublar".
N. Məmmədli bildirib ki, reket jurnalistlərlə bağlı mübarizənin nəticəsi olmalıdır: "Reket mətbuat, şantajçılar hər zaman kimlərinsə işinə yarayır. Bunun kökünü mətbuatda deyil, başqa yerdə axtarmalıyıq. Reket jurnalistikaya qarşı mübarizə aparmaq bizim peşəmizin gələcəyi ilə bağlı məsələdir. Mübarizəni qanun müstəvisində necə aparırıq? Məsələn, "Media haqqında" qanunda da, Agentliyin keçirdiyi müsabiqələrdə də göstərildiyi kimi, mediaya bütün ödənişlər, jurnalistlərin gəliri şəffaf olmalıdır. Əgər media dövlətin güzəşt və imtiyazlarından faydalanmaq istəyirsə, gəlirləri şəffaf olmalıdır. Mediaya qeyri-rəsmi ödənişin hər bir qəpiyi media etikasına, Azərbaycan dövlətinin və ictimaiyyətinin maraqlarına qarşı işləyir".
