Xəbər verdiyimiz kimi, avqustun 4-də Azərbaycanın Böyük Britaniyadakı səfirliyi radikal-dini qrup tərəfindən hücuma məruz qalıb. Hadisənin üzərindən 4 gün vaxt keçib və bir sıra dövlətlər və təşkilatlar bu hücuma münasibət bildiriblər.
Turkustan.az səfirliyimizə hücum aktını qınayan bəyanatlar səsləndirən ölkə və təşkilatların siyahısını təqdim edir:
1. Türkiyə
Hadisənin baş verdiyi gün Türkiyə xarici işlər naziri Mövlud Çavuşoğlu azərbaycanlı həmkarı Ceyhun Bayramovla telefon danışığında hadisədən narahatlığını dilə gətirib. Eləcə də Türkiyə prezidenti Rəcəb Tayyib Ərdoğan avqustun 6-da jurnalistlərə veridiyi açıqlamada hadisəni pisləyərək "qəbuledilməz" adlandırıb.
2. Böyük Britaniya
Bu ölkənin Azərbaycandakı səfirliyi də hadisəni pisləyən bəyanat yayımlayıb:
"Böyük Britaniya Azərbaycanın Londondakı səfirliyinə daxil olan etirazçıların hərəkətlərini pisləyir və hazırda bu məsələ ilə bağlı hərtərəfli araşdırma aparır".
3. Türk Dövlətləri Təşkilatı
"Azərbaycanın London səfirliyinə radikal dini qrup tərəfindən edilən vəhşi və qəbuledilməz hücumu pisləyirik. Bu insanlıqdan kənar hərəkətin əhatəli şəkildə araşdırılmasına çağırırıq".
4. Özbəkistan
Bu ölkənin xarici işlər nazirliyi avqustun 5-də səfirliyimizə hücumu pisləyən bəyanat yayıb:
"Diplomatik nümayəndəliklərin üzvlərinin həyatı və sağlamlığı üçün təhlükə yaradan istənilən hərəkəti qətiyyən yolverilməz hesab edirik. Biz bu insidentin hərtərəfli araşdırılmasına və hücumda əli olanların hamısının məsuliyyətə cəlb edilməsinə çağırırıq. Özbəkistan tərəfi xaricdəki vətəndaşlarının təhlükəsizliyinin və müdafiəsinin təmin edilməsində qardaş Azərbaycana dəstəyini ifadə edir"
5. Qırğız Respublikası
Bu ölkənin xarici işlər nazirliyi avqustun 5-də səfirliyimizə hücumu pisləyən bəyanat yayıb:
"Avqustun 4-də Azərbaycan Respublikasının Böyük Britaniyadakı səfirliyinə edilən hücumu və onun əmlakına qarşı törədilmiş vandalizm aktını qətiyyətlə pisləyirik. İnsidentin hərtərəfli və obyektiv araşdırılmasına, günahkarların məsuliyyətə cəlb olunmasına çağırırıq".
6. Rusiya
Rusiya XİN sözçüsü Mariya Zaxarova rəsmi sosial şəbəkə hesabından etdiyi paylaşımda Azərbaycan diplomatlarına dəstəyini ifadə edib:
"Azərbaycanın Britaniyadakı səfirliyinə radikal hücum məni şoka salıb. Günorta çağı vandalların bütöv bir izdihamı diplomatik nümayəndəliyin ərazisinə soxulub, dövlət rəmzlərini təhqir edib, binaya ziyan vurub. diplomatik nümayəndəliklərin ərazisinin toxunulmazlığı beynəlxalq münasibətlərin təməl daşıdır, bütün dünyada diplomatların rahat işini təmin edir. Belə hadisələr adi hal deyil".
7. Gürcüstan
Gürcüstan xarici işlər naziri İliya Darçiaşvili 4 avqustda Ceyhun Bayramovla telefon danışığında Londondakı Azərbaycan səfirliyinə qarşı baş verən hücumu qınayıb və ölkəmizlə həmrəylik ifadə edib.
8. İslam Əməkdaşlıq Təşkilatı
"İslam Əməkdaşlıq Təşkilatının (İƏT) Katibliyi 4 avqust 2022-ci il tarixində Azərbaycan Respublikasının Böyük Britaniya və Şimali İrlandiya Birləşmiş Krallığındakı səfirliyinə radikal dini qruplar tərəfindən zorakı və qəbuledilməz hücumu pisləyir".
9. Qazaxıstan
Qazaxıstan XİN:
"Bu il avqustun 4-də ekstremistlərin Azərbaycan Respublikasının Londondakı səfirliyinə hücumu ilə əlaqədar diplomatik nümayəndəliklərə və onların şəxsi heyətinə qarşı hər hansı zorakılıq təzahürünü yolverilməz hesab edirik".
10. Pakistan
Pakistanın Azərbaycandakı səfiri Bilal Haye:
"Biz ötən gecə bəzi radikal qüvvələrin Londondakı Azərbaycan səfirliyinə təcavüzü ilə bağlı məlumat aldıq. Diplomatik missiyaların qorunması yüksək tələblərə uyğun olmalıdır. Bununla bağlı öhdəliklər yerinə yetirilməli idi. Bu hadisəni pisləyirik".
(bizim.media)
