Dünya, sənin qonağınam,
Qonağına, dur yaxşı bax.
Gedənini yadda saxla,
Qalanına bir yaxşı bax.
Dərdin ilişib qaldığı,
Sevincin növbə aldığı,
Kədərin bəzək saldığı
Yanağıma bir yaxşı bax.
Gülüş içində ağlayan
Çiçəyindir yas saxlayan.
Düşməni dost tək saxlayan
Qucağına bir yaxşı bax.
Hayanmı qardaşa qardaş?
Nə yad oldun, nə də yoldaş.
Yetiminə qaldımı aş?
Ocağına bir yaxşı bax.
Dünya, sənin qonağınam...
