QEYD: Azərbaycan Respublikasının Medianın İnkişafı Agentliyinin maliyyə dəstəyi ilə çap olunur
VIII Yazı
AMEA Fəlsəfə və Sosoiologiya İnstitutunun aparıcı elmi işçisi,
dosent, fəlsəfə üzrə fəlsəfə doktoru Faiq Ələkbərli
20-ci əsrin əvvəllərində Pozitivizmə rəğbət bəsləyənlərdən olan Sənətulla Eynullayev O.Kontun, H.Spenserin ideyalarını təbliğ etmişdir. O, "Nidayi ruh" məqaləsində yazırdı: "Avropa və digər qitəati-mədəniyyənin fəlsəfeyi-elmiyyəsi, həqiqiyyun, əqliyyun, təkamiliyyun və madiyyun (realizm, rasionalizm, evolyusionizm, spiritualizm və materializm) və sairə kimi yekdigərinə müxalif olan birər məsləki-fəlsəfə təşkil ediyorlarsa da, bunların əsası... bilməməkdən ibarət və... bilməməkdən nəşət edən şeylərdir. Belə olmasa idi yek digərə müxalif yüzlərcə bir (izm) məsləki-fəlsəfi... meydana gəlməzdi: bunlardan bildiyi həqiqəti-müsbət (pozitivizm) olsa idi bir zaman surəti-qətiyyətdə qəbul edilər, ixtilafa məhəl qalmazdı". [1]
Ona görə ictimai inkişafın mənbəyi islam dini və onun doğurduğu adət və ənənələrdir: "İnsanların maddi və mənəvi səadətləri yalnız islamiyyətlə təmin edilmişdir. Çünki maddi və və mənəvi müaviznəti həyatı tənzim edəcək ədaləti həqqaniyyət islamın şəriəti əsasiyyəsindədir". [2] Eynullayev daha sonra yazırdı: "Bəşəriyyət, təbiətin xaricində bir ünsüri-müstəqil degil, bilaəks təbiətin içindəki əczai-mövcudatdan bir cüz olub, mənzumeyi-kainatın ahəngi... Ümumi hərəkəti ilə bir nizamda hərəkət edir. Mənzumeyi-kainat isə bütün heyətilə günəşin təsirinə əsir olub, təvəllüd edəcəyi nə qədər əhvali-hadisat və təbəddülar var isə... günəşin təsiri ilə vücuda gəlir. Heyəti-kainat makinasının bir cizi olan küreyi-ərz bütün kütləsilə günəş təsirinə tabe olduğu kimi, onun üzərində yaşayan canlı ünsürün cümləsindən bir növü də ki, "bəşər" deyilməklə məlumdur doğrudan-doğruya kureyi-ərzdə vüqua gələn təhəvvülata uyğun olaraq hərəkət edir... bunun üçün insanın maddiyyat və mənəviyyatı, hissiyyatı və əqliyyatı təbiət qüvvələri ilə bağlanmışdır. Təbiətdə qədər hadisat və təbəddülat vüqua gəlsə insanda da vaqe olur". [3]
Eynullayev başqa bir məqaləsində də yazırdı ki, "sosializm... quru xəyal aləmindən çıxacaq şey olmadığından bəşəriyyətə hənüz bir şey verməmişdir". [4] Ona görə sosializm gerçəkləşsə belə, bəşəriyyət indiki bəlalardan, böhranlardan qurtula bilməyəcəkdir. Eynullayev "Mərakeşdə qiyam" məqaləsində isə yazırdı ki, bəşəriyyətin artmasına nisbətən torpaq artmayıb, getdikcə sıxılır: "Buna görə də millətlər bir-birinə hücum edib, müharibə açmağa, onun torpağını almağa və kəndisinə (özünə) istila və istimlak etməyə məcbur olur". [5]
Əbdülxaliq Qafarzadə Cənnətinin (1855-1931) dünyagörüşündə islamçılıq, turançılıq və Azərbaycan türkçülüyü xüsusi yer tutmuşdur. Hələ, 1880-ci illərdə birgə iştirakçısı olduqları şeir məclislərində Cənnətinin istedadını görən S.Ə.Şirvani onun həmin dövrdə az tanınmasına təəccübünü də ifadə etmişdir. Seyid Əzimin bu təəccübünə Cənnətinin cavabı konkret olmuşdur: "Kiminin məşhurəti olur, kiminin hünəri".
Cənnətinin islamlığa həsr etdiyi əsərləri "Mühəssənati-şəriyyə", "Yənbuil-hikmət", "Təhvili-övzan" və başqalarıdır. Peyğəmbərə (s) həsr etdiyi şeirlərində Allahın Rəsulunu yer üzünü işıqlandıran böyük şəxsiyyət kimi təsvir edən Cənnətiyə görə, onun dünyaya gəlməsi ilə insanlar səadətə qovuşmuş, cəhalət zülməti hidayət nuri ilə basılmış, hətta, Kəsranın tağı düşmüş, farsların atəşi sönmüşdür. O, yazırdı:
Hansı peyğəmbər olub sən kibi alihimmət?
Yox təməddündə sənə eyləyən əsla sibqət,
Yüz verir mərdümə asarini görəcək heyrət,
Səndən özgə kimə, aya, bu şərəfdir qismət,
"Adəmə vəchi-mübahat ola izzü nəsəbi".
Digər şeirində isə Cənnəti yazırdı ki, "maddəri-əyyam" elə bir xələf doğurdu ki, bu dünyada misalı nə görülüb, nə də görüləcəkdir:
Necə xələf ki, onun əmri ilə dünyanın
Təmam rübi edər gah qiyam, gah sücud.
Nəcə xələf ki, Onun qədrü şəninə nisbət,
Ümumxəlq şüunatı görsənin məhdud.
Nəcə xələf ki, onun adı zikr olunduqda,
Rəvani-pakinə irsal olur səlamü dürud.
Cənnəti İslam dini ilə yanaşı millət, vətən, tərəqqi və hürriyyətə aid də bir çox dəyərləri əsərlər yazmışdır. Hətta, bir çox müasirlərinə görə Cənnəti Türk şairləri arasında ilk dəfə hürriyyətdən, milli azadlıqdan bəhs etmişdir. Məsələn, Əlabbas Müznib hürriyyətlə bağlı yazdığı şeirlərinə görə Cənnətini "Hürriyyət peyğəmbəri" adlandırmışdır. Cənnəti "Hürriyyət" adlı şeirlərinin birində yazırdı:
Başında var isə şuri-şərabi-hürriyyət,
Qulaq ver, çala hər kim rübabi-hürriyyət.
Qəsuri-Qeysəri viranədən betər görürəm,
Ümumi-mərdümə açmazsa babi-hürriyyət.
Gözümə kül görünür misli-atəşi-Nəmrud,
Məşamə yetməsə buyi-gülabi-hürriyyət.
Adın mədrəsə qoymaqdan isə, cəhl evi qoy
O məktəbi ki, yox onda kitabi-hürriyyət.
Cənnətiyə görə, millətin cəhalətdən və köləlikdən qurtuluşu uğrunda mübarizə aparanlar isə həmişə zülmlə rastlaşıb əzab-əziyyətə düçar olublar. Yəni millət uğrunda çalışanların, onun azadlığı üçün yol axtaranların özləri zəncirlənərək həbsxanlara salınıbılar. Cənnəti təəssüf edirdi ki, millət uğrunda çalışanları isə bir çox hallarda əksər soydaşları da mübarizə meydanında yalnız buraxırlar. Hətta, öz içimizdən elələri tapılır ki, qarınlarından və vəzifələrdən ötrü qarındaşlarını və soydaşlarını məhv edirlər. Cənnəti yazırdı:
El üçün ağlayan gözdən, demişlər, kur olur axır,
Əzəldən kur imiş el qüssəsindən gəlməyən dadə.
Ümidin kəssə hər kəs öz elindən, bikifayətdir,
Kifayətsizlər ümidindəyiz, Həq yetsin imdadə.
Denəli, əcnəbi millətlərin inkişaf etdiyi bir zamanda Azərbaycan türklərinin geridə qalmasının səbəbini Cənnəti bir tərəfdən çar Rusiyasının mütəmləkəçi siyasətində, digər tərəfdən yalançı "millətpərəstlər"in və "ruhanilər"in əməllərində görmüşdür.
Bütün bunlara baxmayaraq, Cənnəti hesab edirdi ki, bir millət təhqir olunduğu halda bu həqarətə cavab verməli, yəni milli oyanışa nail olmalıdır. Çünki həqarətlə qarşılaşdığı halda, ona cavab verə bilməyən və bununla razılaşan millət tarix səhnəsindən silinir. O yazırdı ki, azərbaycanlıllar soykökünə görə türk, turanlı olduğuna görə heç vaxt bu cür həqarətlə razılaşa bilməz. Onun fikrincə, hazırda müstəmləkə altında yaşamağımız müvvəqqətidir və türklər keçmiş şan-şöhrətlərini xatrılayaraq yenidən milli oyanışa nail olacaqlar:
Hərçənd düçari-mühəni-əhli-cəfayız,
Hərçənd bu əyyamdə pabəndi-bəlayiz,
Ey xar görən bizləri, bizlər nücəbayız,
Meydani-həmiyyətdə ələmdari-vəfayiz.
Turanlılarız, sahibi-şənü şərəfiz biz,
Əslafımızın nayibi xeyrül-xələfiz biz.
Ey zülmü-cəhalət, həzər et göz yaşımızdan,
Durr olmalısan torpağımızdan, daşımızdan,
Bu yolda mədəd bizlərə məsləkdaşımızdan,
Hürriyyət üçün vaz keçəriz can-bahımızdan.
Turanlılarız, sahibi-şənü şərəfiz biz,
Əslafımızın nayibi xeyrül-xələfiz biz. [6]
Bütün hallarda, Cənnətinin fikrincə, kim millətinə xidmət edirsə həm aləmdə adı və izi qalacaq, həm də rəhmət qazanacaqdır. Onun şeirlərində Milləti qədər Vətənə bağlılığı da çox yüksək səviyyədə əks olunmuşdur. O, Vətənə aid bir sıra şeirlər yazmış, torpağını satanları ən ağır şəkildə ittiham etmişdir. Cənnəti yazırdı ki, kim torpağını satarsa gec-tez gözünə qara torpaq dolacaqdır:
Ey Türk! Vətən tərki qılar qəti-həyatın,
Məhməl olur ol dəm hərəkatü səkanatın,
Birdir vətənin, getsə həyat ilə məmatın,
Təlqin oxyur, Cənnəti, həngami-vəfatın.
Bu şivənü fəryadı əbəs qılmayır üşşaq,
Torpaq satanın çeşminə olsun qara torpaq!
Cənnətinin Vətənə həsr etdiyi ən məşhur şeiri isə "Vətən təranəsi"dir. Şairin fikrincə, hər bir millət üçün torpaq o qədər müqəddəsdir ki, dərisi bədənindən soyulsa belə, kimsə ondan bir qarış da olsun başqasına verməməlidir:
Himmət ediniz, düşməni məhv eyləyəlim ta,
Ətfal kimi qaçmayalım məskənimizdən.
Zülmat kimi tirəvü tar olsa da dünya,
Nurani edək ani dili-rövşənimizdən.
Namusi-vətən hifzi üçün bəzl edəlim can,
Ta vizrü vəbali götürək gərdənimizdən.
Cənnəti Türklük və Vətən məfkurəsini 1919-cu ildə "Azərbaycan" qəzetində nəşr olunmuş "Bayrağımız" şerində də ifadə etmişdir. O, yazırdı:
Ta ki Türk oğlu ayıqdır, vətəni qoruyacaq,
Yatmayıb, yatmayacaqdır əbəda bayrağımız!
Bu cür milli məfkurəni Sovet dövründə yaşatmaq Cənnəti üçün heç də asan olmamışdır. Bir tərəfdən Sovet casuslarının təqibi, digər tərəfdən ailəsində baş verən bədbəxtliklər (övladlarını vaxtsız itirməsi) Cənnəti üçün dözülməz olmuş, o, 1931-ci ildə vəfat etmişdir.
Qarabəy Qarabəyli (1873-1953) Şəmkir alman-rus liseyini, daha sonra Tiflis Klassik gimnaziyasını bitirmiş və Moskva Universitetinin Tibb fakültəsinə daxil olmuşdur.1901-ci ildəBakıya qayıtdıqdan sonra o, "İttifaqi-müslimin" təşkilatının üzvü, "Difai" partiyasının rəhbərlərindən olub. Həmin dövrdən Qarabəyli publisist fəaliyyətinə başlayaraq "Həyat", "İrşad", "Kaspi" və digər nəşrlərlə əməkdaşlıq edib.
1906-cı ildə Qacarlara, 1908-ci ildə İstanbulagələrərək burada "Səadət" adlı təşkilat yaradan Qarabəyliyə həmin il hakimiyyətə gələn "Gənc türklər" vəzifə təklif etsələr də o bundan imtina etmiş və 1911-ci ildəBakıya gələrək həkimlik və publisistik fəaliyyətini davam etdirmişdir. Az sonra yenidən İstanbula gedən Qarabəyli 2-ci RusiyaFevral burjua inqilabındansonraBakıya qayıtmış və "Kaspi" və "Yeni həyat" qəzetlərinin baş redaktoru olmuşdur.
O, 20-ci əsrin ilk illərində müsəlman xalqlarının nicatını yaşıl inqilabda, yəni "İslam birliyi"ndə axtarmışdı. Qarabəyli yazırdı: "Biz özümüz bir yol bulub, o yol ilə gedəcəyiz. Bizim başqalar ilə büğz və ədavətimiz yoxdur. Bizim özümüzə məxsus daha layiq, daha şanlı bir vəzifeyi-mücahidəmiz vardır ki, o vəzifə də zülməti-qəflətdə bulunan külliyyəti-avam arasında nuri-maarifi əkməkdir". [7]
[1]Eynullayev S. Nidayi-ruh. "İqbal" qəzeti, 28 mart, 1912-ci il,№19
[2]Eynullayev S. İqbal. "İqbal" jurnalı, 6 mart, 1912-ci il,№1